Dövrələrarası fasilədə təlim-məşq toplanışını davam etdirən “Zaqatala”nın fevralın 2-də yoxlama görüşü keçirmək üçün Gürcüstana yollanacağını ötən saylarımızın birində xəbər vermişdik. Onu da bildirmişdik ki, hazırlıq dönəmində bu artıq bölgə təmsilçisinin qonşu ölkəyə ikinci səfəri olacaq. Birinci dəfə yanvarın 26-da Tiflisə gedən “ağ-yaşıllar” güclülər dəstəsində çıxış edən “Lokomotiv”lə üz-üzə gəlmiş və minimal hesabla məğlub olmuşdu. Ötən şənbə isə Rüstəm Məmmədovun baş məşqçi olduğu klub “Kaxeti” ilə münasibətləri aydınlaşdırıb. “Lokomotiv”dən fərqli, Telavi təmsilçisi birinci divizionda çıxış edir. Və ötən mövsüm yalnız pley-offda uduzmaqla elitaya yüksəlmək şansını əldən verib.
Rüstəm bəylə əlaqə saxlayıb şənbə günü keçirilən oyunla bağlı fikirlərini öyrəndik: “İlk hissə bizim üstünlüyümüz şəraitində keçdi. Bunun da nəticəsi kimi ilk 45 dəqiqədə minimal hesabla qalib gəldik. Lakin fasilədən sonra rəqibin baş məşqçisi heyəti tam dəyişdi və meydana “yeni 11-lik” buraxdı. Meydana yeni çıxanlar isə oyunun axarını dəyişməyi bacardılar və sonda 1:3 hesabı ilə məğlub olduq. Əslində özümüz-özümüzü uduzdurduq. Təsəvver edin ki, qapımızda gördüyümüz 3 topdan ikisi avtoqol oldu. Buna baxmayaraq, futbolçularımın çıxışından razı qaldım. Bu dəfə Gürcüstana bəzi aparıcı futbolçularımız olmadan getmişdik. Onların zədələri olduğundan risk etməyi lazım bilmədim. Komandada baxışda olan 3 oyunçunu da “Kaxeti” ilə görüşdə bir daha sınaqdan keçirdik. Sonda belə qərara gəldik ki, Kamal Dərziyevi və soyadını unutduğum Muradı düşərgədə saxlayaq. Kənana isə uğurlar arzulayıb, yola saldıq. Artıq toplanışı başa vurmuşuq. Fevralın 8-də keçiriləcək çempionat oyununa hazırlaşırıq”.
RƏŞAD
