Almaniyanın 3-cü liqasında 22-ci turun oyunları keçirilib. Rüfət Dadaşovun formasını geydiyi “Proyssen” doğma meydanda “Kayzerslautern”lə münasibətləri aydınlaşdırıb. Münster təmsilçisi iki cavabsız qolla qalib gəlib. Start heyətində meydana çıxan Dadaşov 73-cü dəqiqədə əvəzlənib. "Proyssen"in hesabında hazırda 33 xal var və komanda 7-ci pillədə qərarlaşıb.
Rüfətin kiçik qardaşı Renat isə həftəsonunu oynamadan keçirib. Belə ki, Portuqaliya sequndasının 20-ci turunda Dadaşovun şərəfini qoruduğu “Eştoril” “Leykoeş”in qonağı olub. Meydan sahibləri 2:0 hesabıyla qalib gəlib. Renatın adı qarşılaşmanın protokoluna daxil edilməyib. Qeyd edək ki, 20 oyuna 33 xal toplayan “Eştoril” turnir cədvəlində 4-cü yerdədi.
Hollandiyanın ikinci liqasının 23-cü turunda isə Ziya Əzizov meydana çıxmayıb. U-21-in üzüvünün məxsus olduğu “Neymegen” doğma meydanda “Utrext”in 2-ci komandası ilə üz-üzə gəlib. "Neymegen" 4:1 hesablı qələbə qazanıb. Ziyanın adı qarşılaşmanın iştirak ərizəsinə salınmayıb. Geridə qalan turlarda hesabına 30 xal yazdıran “Neymegen” sıralamada 15-ci yerdədi.
Türkiyənin 1-ci liqasında 20-ci turun qarşılaşmaları baş tutub. Ufuk Budaklı “Boluspor” səfərdə “Ümraniyyəspor”la münasibətlərinə aydınlıq gətirib. Qonaqlar minimalhesablı (0:1) məğlubiyyətlə üzülüb. Ufuk start heyətidə yer alıb və sona qədər mübarizə aparıb. O, 14-cü dəqiqədə sarı vərəqə ilə "mükafatlandırılıb". “Boluspor” hazırda 31 xalla 18 iştirakçı arasında 8-ci pillədədi.
Yığmamızın sabiq hücumçusu Dəniz Yılmazın şərəfini qoruduğu “Gənclərbirliyi” isə səfərdə “Əskişəhərspor”la qarşılaşıb. Qonaqlar 2:3 hesabıyla uduzub. Dəniz ilk "11-lik"də yer alıb və əvəzlənməyib. “Gənclərbirliyi” 41 xalla ikinci pillədə yer alıb.
Türkiyədə təlim-məşq toplanışında olan Rusiya “Krılya Sovetov”u yoxlama oyununda qüvvəsini sınayıb. Ramil Şeydayevin formasını geydiyi Samara təmsilçisi Bolqarıstan “Botev”i ilə üz-üzə gəlib. Ruslar sınaq matçından 1:0 hesablı qələbə ilə ayrılıb. Şeydayev bu qarşılaşmanın iştirakçısı olmayıb.
Ukrayna çempionatında 18-ci turun matçları keçirilib. Pavel Paşayevli "Aleksandriya" səfərdə "Vorskla"nın qonağı olub və evə 3 xalla (1:0) dönüb. Paşayev oyunu ehtiyat oyunçular skamyasından izləyib. "Aleksandriya" hazırda turnir cədvəlində 3-cü yerdədi.
Millimizin sabiq üzvü Andrey Popoviç özünə yeni klub tapıb. 27 yaşlı qapıçı karyerasını Ukraynada davam etdirəcək. O, "Minay" klubu ilə müqavilə bağlayıb. Komandanın təlim-məşq toplanışında olan Andreyin çıxışı məşçilər korpusu tərəfindən bəyənilib, müqavilə imzaladıqdan sonra isə Slovakiya toplanışına aparılıb.
"Minay" 17 turdan sonra 2-ci liqanın A qrupuna başçılıq edir. Qeyd edək ki, millimizin sabiq üzvü karyerası ərzində "Bakı", "Abşeron", "Sumqayıt", "Turan" və "Qəbələ"də çıxış edib.
FARİZ