O bundan sonra “Qarabağ”da tərcüməçilik edəcək
Cümə axşamı Tofiq Bəhramov adına Respublika stadionunda derbiöncəsi baş tutan məşqdə “Qarabağ”ın heyətindəki bir şəxs jurnalistlərin təəccübünə səbəb oldu. Yox, söhbət hansısa futbolçudan getmir. Vaxtilə Berti Foqtsa Robert Prosineçkinin tərcüməçisi kimi görməyə alışdığımız Aydın Rüstəmovu nəzərdə tuturam.
Həmin Rüstəmov ki, Qurban Qurbanovun yığmanın baş məşqçisi olduğu dönəmdə də millinin sıralarındaydı. Lakin birdən-birə nə baş verdisə, Aydın bəy İcraiyyə Komitəsinin Qurbanovla bağlı məlum qərarından sonra “Qarabağ”a tərəf “əyildi”. Dekabrda “Arsenal”la oyun üçün Londona yollanan nümayəndə heyətinin tərkibində yer aldı, daha sonra “köhlən atlar”ın sıralarında görünməyə başladı.
Nəzərinizə çatdıraq ki, vaxtilə AFFA-nın təcrcüməçi kimi işə cəlb etdiyi həm Aydın Rüstəmov, həm də Osman Rəhimov məşqçilik kateqoriyasına sahibdilər. “Şüşəli bina”da olduqları illər ərzində öz işləri ilə məşğul olmaqla yanaşı, həm də məşqçilik kurslarında iştirak ediblər. Bunun nəticəsidi ki, Rəhimov cari mövsümün əvvəlində “Sumqayıt”ın məşqçilər korpusunda yer almışdı, qış fasiləsində “Sabah”a – Elşad Əhmədovun yanına yollanmışdı.
Bu faktı nəzərə alanda, üstəgəl, Aydın Rüstəmov “Qarabağ”ın məşqində tərcüməçidən çox məşqçi kimi gözə dəydiyindən, “eynəkli adam”ın Qurbanovun yanında məşqçiliyin sirlərinə sahib olduğunu ehtimal etdik. Lakin dünən məsələnin mahiyyətini öyrənmək üçün klubun mətbuat katibi Nurlan İbrahimovla əlaqə saxlayanda fərqli cavab eşitdik: “Aydın Rüstəmov kluba tərcüməçi kimi cəlb olunub. Bəli, bizdə Elvar Quliyev çalışır. Lakin o daha çox ispan dilinə üstünlük verdiyindən, belədə alman və ingilis dilləri ilə bağlı boşluq yaranırdı. Ona görə də “Qarabağ”da çalışır. Məşq prosesində yaxından iştirak etməsi də normaldı. Elvar da meydana ayaq basır, futbolçu və məşqçi heyətinin yanında olur. Fikrimcə, normaldı”.
Deyək ki, bunu başa düşdük. İkinci sual: Aydın bəy “Qarabağ”da çalışırsa, yığmadakı taleyi necə olacaq? Yeni gələcək əcnəbi mütəxəssisin yanında kim olacaq? Və ya hazırda aparılan danışıqlarda kim iştirak edir? Nurlan bəy bu sualı da cavabsız qoymadı: “Qurban Qurbanov yığmadan uzaqlaşandan sonra Aydın Rüstəmov da millidən ayrılıb. Ona görə də sırf “Qarabağ”da işlədiyini deyə bilərəm”.
HƏBİB