“Obradoviç hücum futbolunun tərəfdarıdı”
Yanvarın 21-24-ü aralığında Antalyada toplanışda olan və bu arada “Spartak-2” ilə yoxlama matçında qüvvəsini sınayan U-21-in yeni simasını yalnız Rusiya klubunun saytı vasitəsilə izlədiyimiz yayında görə bilmişik. Bəs yığma daha yaxından - onun öz düşərgəsindən necə görünüb? Baş məşqçi Milan Obradoviçin israrla özünə köməkçi götürdüyü “Sumqayıt-2”nin baş məşqçisi Elbrus Məmmədovla bu barədə söhbətləşdik. Təcrübəli məşqçi U-21-in yeni mərhələyə uğurla start verdiyini, ancaq hələ qarşıda çox işlərin görüləcəyini deyir. Elbrus bəy bu mərhələdə seleksiyanın düzgün aparılmasını vacib sayır: “Yaxşı olardı ki, yığmanın toplanışı və oyunu ilə bağlı baş məşqçinin özündən soruşasız. Mənim fikrimi öyrənmək istəyirsizsə, toplanış faydalı oldu. Hətta əlverişsiz hava da planlarımıza təsir etmədi. Planlaşdırdığımız hər iki məşq baş tutdu, problem yaşanmadı. Bu mənada bəxtimizin gətirdiyini deyə bilərəm. Düzdü, oyunun gedişində külək var idi, ancaq bu, ciddi problem sayılmamalıdı. Çünki rəsmi oyunda da yağış, qar ola bilər.
Yığma üzvləri klubların düşərgəsindən yorğun gəlmişdilər. Bərpa üçün vaxt yox idi. Bu ərəfədə bütün futbolçularda yüklənmə olur, bu normal haldı. Amma biz futbolçuların yükləndiyini məşqlərdə nəzərə aldıq. Oyuna gəlincə, məncə, yaxşı alındı. İlk yarıda küləyə qarşı oynadıq. Buna görə oyunu müdafiədən qurduq. Düzdü, başlayanda 4-3-3 taktikasına üstünlük vermişdik. Ancaq şəraitə görə bir neçə sxemə, o cümlədən 4-1-4-1-ə keçdik. İkinci hissədə daha baxımlı oynadıq, hücumlarımız da oldu. Deyə bilərəm ki, bərabər, başabaş mübarizəyə şahidlik etdik. Rəqibin gücünü də nəzərə almaq lazımdı. “Spartak-2” Rusiyanın birinci liqasında oynayır. Bu klubun gənclərdən ibarət komandası həmişə seçilib, səviyyəli olub”.
Maraqlıdı, Milan Obradoviç oyundan sonra yetirmələrinə irad bildiribmi? Ümumiyyətlə, serb mütəxəssis yığmanı hansı üslubda oynadacaq? “Toplanış tanışlıq xarakteri daşıyırdı. Oyundan əvvəl iclas oldu. Baş məşqçi futbolçulara tələblərini çatdırdı, onlara müəyyən tövsiyələrini verdi. Oyundan sonra da toplantı baş tutdu. Bu dəfə çatışmazlıqlar diqqətə çatdırıldı. Obradoviç bildirdi ki, hər kəs məsuliyyətini anlamalıdı. Növbəti toplanışda “Spartak-2” ilə oyun daha geniş təhlil olunacaq. Baş məşqçi hücum futbolunun tərəfdarıdı. Yəni praqmatik yox, baxımlı oyuna üstünlük verir. Təbii ki, oyunda hücumların təşkili baxımından müəyyən problemlər gözə dəydi. Bunun üzərində işləyəcəyik”.
Böyük ehtimalla fevralda baş tutacaq növbəti toplanışda yığmada yeni oyunçular görə biləcəyik: “Hələ səfər ərəfəsində qəzetinizə açıqlamamda demişdim ki, bütün namizədləri birdən çağırmaq, 50-60 nəfəri aparıb bir oyunda hamısına şans vermək mümkün deyil. U-21 yeni baş məşqçinin rəhbərliyi altında ilk dəfə bir araya gəldi. İlk olaraq, əsasən premyer-liqada çıxış edən futbolçulara üstünlük verdik. Sonra divizionun lider komandalarına, turnir cədvəlində ilk “üçlüy”ə nəzər saldıq, seçimimizi onların heyətindən etdik. Növbəti toplanışlarda yeni namizədləri sınaqdan keçirəcəyik. Əlimizin altında 50 nəfərlik siyahı var. Onların arasında legionerlərimiz də yer alıb. İyun-iyul ayına kimi vaxt var. Elə bir toplanışla yığmanın “onurğa sütunu”nun formalaşdığını deyə bilmərik. Baş məşqçi növbə ilə digər namizədləri də gözdən keçirəcək. Ola bilər, 50 nəfərin hamısı çağırılmaz. Çünki bizim siyahıda olmaq başqa, futbolçunun real durumu başqa. Yəni yaşı U-21-ə düşənlərdən kimsə formada deyilsə, onu yığmaya çağıra bilmərik. Məşqçilər korpusu namizədlərin hamısını çempionatın gedişində gözdən keçirəcək, oyunlarını izləyəcək və ehtiyac duyularsa, toplanışa dəvət olunacaq. Təbii ki, bəyənib-bəyənməmək Milan Obradoviçin rəyindən asılı olacaq, son sözü o deyəcək. Hələ dəqiq proqram olmasa da, qarşıdakı ayların hamısında bir araya gəlmək istərdik. Çünki qeyd etdiyim kimi, komanda ilə görüləcək çox iş var. Layiqlilərdən hər kəsi öz yerinə qoymaq və onların anlaşmasını təmin etmək üçün zamana, mümkün qədər bir yerdə çox olmağa ehtiyac var”.
MİRAĞA