Ölkə xaricində çıxış edən futbolçularımızın komandalarından bəziləri yoxlama, bəziləri isə rəsmi matçlar keçirib. Öncə sınaq görüşləri ilə bağlı məlumatları diqqətinizə çatdıraq. Dmitri Nazarovun çıxış etdiyi "Ertsgebirge" qış fasiləsində sonuncu yoxlama oyununa çıxıb. Aue təmsilçisi "Fyurstenvalde" (Almaniya) ilə qarşılaşıb. Matç "Ertsgebirge"nin 2:0 hesablı qələbəsi ilə başa çatıb. Nazarov matçın qəhrəmanı olub. Belə ki, hər iki qolu Dmitri vurub. O, 24 və 48-ci dəqiqələrdə fərqlənib.
Ramil Şeydayevli "Krılya Sovetov" BƏƏ-də təlim-məşq toplanışını davam etdirir. Samaralılar hazırlıq çərçivəsində növbəti yoldaşlıq oyununda Latviya "Riqa"sı ilə qarşılaşıb. Görüş "Krılya Sovetov"un minimal üstünlüyü (1:0) ilə yekunlaşıb. Ramil ilk 45 dəqiqədə meydanda olub.
Ukrayna “Aleksandriya”sı da yoxlama oyununda qüvvəsini sınayıb. Pavel Paşayevin şərəfini qoruduğu komanda Türkiyədəki təlim-məşq toplanışında Bolqarıstan “Botev”i ilə üz-üzə gəlib. "Aleksandriya" 2 cavabsız qolla uduzub. Paşayev ikinci hissədə şans qazanıb.
Keçək rəsmi oyunlara. Almaniya 3-cü liqasında 21-ci turun görüşləri keçirilib. Rüfət Dadaşovlu “Proyssen” səfərdə “Karl Tseyss Jena” ilə qarşılaşıb. Münster klubu bu oyundan 1 xalla ayrılıb - 0:0. Rüfət start heyətində meydana çıxıb, sonadək mübarizə aparıb. "Proyssen" hazırda turnir cədvəlində 7-ci pillədədi.
Türkiyə 1-ci liqasının 19-cu turunda sabiq yığma üzlərinin komandalarından biri qalib gəlib, o biri isə uduzub. Ancaq futbolçularımızdan heç biri meydana çıxmayıb. Ufuk Budakın formasını geydiyi “Boluspor” "doğma divarlar" arasında “Elazığspor”la qarşılaşıb. Meydan sahibləri 3:0 hesablı qələbə qazanıb. Ötən tur qırmızı vərəqə ilə meydandan qovulan Ufuk cəza səbəbindən bu görüşün iştirakçısı olmayıb. “Boluspor” 31 xalla 18 iştirakçı arasında yeddincidi.
Dəniz Yılmazın çıxış etdiyi “Gənclərbirliyi” isə doğma meydanda “Altınordu” ilə üz-üzə gəlib. Ankara təmsilçisi rəqibin 2 qoluna cavab verə bilməyib. Dənizin adı iştirak ərizəsinə salınmayıb. Bu tura qədər vahid lider olan “Gənclərbirliyi” növbəti məğlubiyyətin ardından zirvəni əldən verib və hazırda 41 xalla 2-ci pillədədi.
Hollandiya ikinci liqasında 22-ci turun oyunları baş tutub. U-21-in üzvü Ziya Əzizovun komandası “Neymegen” səfərdə "TOP Oss”la qarşılaşıb. Matçda qalib müəyyənləşməyib – 1:1. Ziyanın adı, ümumiyyətlə, protokolda olmayıb. “Neymegen”in hazırda 27 xalının olduğunu və 15-ci yerdə qərarlaşdığını da qeyd edək.