AÇ-2020-nin seşmə mərhələsinin startına 2 aydan da az vaxt qalıb. Ancaq hələ də yığmanın baş məşqçi postu boşdu. Təyinatın ötən ilin sonu, maksimum yanvarın əvvəlində gerçəkləşəcəyi deyilsə də, yubanma davam edir. Tez-tez hansısa mütəxəssisin adı milli ilə yanaşı çəkilir. Bir məqam dəqiqdi ki, yığmanın yeni çalışdırıcısı əcnəbi olacaq. Baş məşqçi axtarışı yönündə gedən proseslə bağlı AFFA-nın dünən yaydığı məlumatla tanış olun: “Millinin hazırda vakant olan baş məşqçi vəzifəsinə təyinatla bağlı namizədlərin müzakirəsi prosesi davam etməkdədi. Ötən dövr ərzində müxtəlif ölkələrdən olan məşqçilərlə görüşlər keçirilib. Yaxın gələcəkdə namizədlərin qısa siyahısının hazırlanması nəzərdə tutulub. Məşqçilər Komitəsinin tövsiyələri də nəzərə alınmaqla hazırlanacaq qısa siyahı müvafiq qaydada AFFA rəhbərliyinə və İcraiyyə Komitəsinə təqdim olunacaq. Proseslə bağlı rəsmi məlumatlar operativ və dəqiq şəkildə ictimaiyyətin diqqətinə çatdırılacaq”.