"Bu, bizim üçün böyük stimul olacaq"
Qış fasiləsinin əvvəlində Anar Nəzirov "Zirə"ni "Qəbələ"yə dəyişdi. Bu üzdən mövsümün ikinci yarısında qəsəbə təmsilçisinin əsas qapıçısı Kamal Bayramov olacaq. Düzdü, "qartallar" Orxan Sadıqlını transfer etdi. Ancaq onun Kamalı heyətdən sıxışdıracağı real görünmür. Onu da qeyd edək ki, bu vaxta qədər vitse-kapitan olan Bayramov Nəzirovun gedişindən sonra komandanın kapitanı oldu.
Kamal "Zirə"nin "yutub" kanalına müsahibəsində qış hazırlıq prosesini dəyərləndirib: "Bakıda başlayan təlim-məşq toplanışımız normal şəkildə davam edir. Yalnız hava şəraiti ilə bağlı ilk yoxlama oyunumuz təxirə salındı. Həmçinin bəzi məşqlərimiz meydanda yox, yağışa görə zalda gerçəkləşib. Bütün bunlara baxmayaraq, hazırlıq prosesini normal dəyərləndirərdim. Bu, Samir Abasovun rəhbərliyi altında ilk təlim-məşq toplanışımızdı. Belə hazırlığa həqiqətən də ehtiyacımız var idi. Çempionatın ilk dövrəsi ağır keçdi, bundan başqa istirahətdən qayıdan futbolçuların psixoloji cəhətdən toparlanması vacib idi. Məşqçinin fəlsəfəsini bizə aşılaması üçün bu toplanışın bizə çox xeyri dəyəcəyini düşünürəm. Çünki Abasovun rəhbərliyi ilə uzun müddət birgə belə hazırlıq prosesi keçməmişdik. Həm məşq zamanı, həm də məşqdən sonra çalışdırıcı fikirlərini daha ətraflı şəkildə aşılayır. Bu baxımdan toplanışı normal sayıram".
O, kapitanlıqla bağlı sualı da cavablayıb: "Hər bir futbolçu üçün kapitanlıq böyük məsuliyyətdi. Bu, təkcə sarğını qolunda daşımaqdan ibarət olan bir şey deyil. Mənə göstərilən etimadı da doğrultmağa çalışacam. Əlimdən gələni edirəm ki, komandaya xeyir verim".
Mövsümün ilk yarısında Zirə İdman Kompleksinin stadionunun süni ot örtüyü təbii ilə əvəzləndiyi üçün komanda ev oyunlarını ayrı-ayrı arenalarda keçirdi. Ancaq artıq "qartallar"ın doğma stadionu hazırdı. Bayramov komandanın "yuva"ya qayıdışı haqda da düşüncələrini bölüşüb: "Komandanın Zirəyə dönməsi bizim üçün böyük stimul olacaq. İlk iki dövrədəki matçları, demək olar, tam olaraq səfərdə keçirilmiş sayardım. Çünki "Zirə" yaranandan bəri "doğma divarlar" arasında keçirdiyi matçlarda uğurlu oyunlarının sayı çox olub. Zirədəki matçlarda həmişə yaxşı mübarizə aparmışıq. Ora qayıtdığımıza görə sevinirik. Çalışacağıq ki, evə dönüşümüzü qələbə ilə qeyd edək, tərəfdarlarımızı da sevindirək. Azarkeşlərimizin də sona qədər bizə dəstək olmasını istəyirik. Bu gün "Zirə" turnir cədvəlində öz yerində deyil. İnşallah, komandanı layiq olduğu pilləyə qaldıracağıq".
Sonda "Zirə"nin kapitanı azarkeşlərə səslənib: "Bu toplanışdan sonra vətənə yüksək əhval-ruhiyyədə qayıdacağımıza inanıram. Bizi qarşıda çətin iki dövrə gözləyir. Komandanın indiki durumu böyük əzmkarlıq göstərməyi tələb edir. Bunun da öhdəsindən gələcəyik. Azarkeşlərimizi də stadiona dəvət edirəm. İlk oyunumuz "Sabah"a qarşı olacaq. Həmin matçda da tərəfdarlarımızı sevindirmək üçün əlimizdən gələni edəcəyik".
FARİZ hazırladı