“Dənizdən, səmadan soruşdum, kimsən sən?” – rəhmətlik Oqtay Ağayevin səsiylə dinlədiyimiz və sevdiyimiz bu gözəl mahnını serbiyalı baş məşqçi Milan Obradoviçin U-21 millimizə təyinatının rəsmiləşdiyi gün xatırladım. Heç də səbəbsiz deyildi. Yəqin ki, həmin o fotoşəkilə siz də baxmışdız və dodağınıza gülüş qonmuşdu. AFFA-nın baş katibi Elxan Məmmədov Obradoviçlə birlikdə şəkil çəkdirmişdi. Sağlarında və sollarında da Azərbaycanın adlı-sanlı məşqçiləri dayanmışdı. Məşqçilər Komitəsinin üzvləri Şahin Diniyev, Yaşar Vahabzadə, Şakir Qəribov və onların sədri Vaqif Sadıqov fotokameraya gülümsəməyə çalışmış, başlar içində başlarının olduğunu göstərmişdilər. Guya ki, AFFA, daha doğrusu, Elxan Məmmədov U-21 millisinə Serbiyadan Şahin Diniyevin oğlu yaşında olan Obradoviçi baş məşqçi təyin edəndə bunlarla məsləhətləşibmiş, onların sözlərinə qulaq asıbmış. Ay sizi, xətakarlar, kimə kələk gəlirsiz?
Hə, mən də həmin şəkilə baxa-başa Oqtay Ağayevin məşhur mahnısını zümzümə etməyə başlamışdım. Özü də elə Məşqçilər Komitəsinin üzvlərinə xitabən: “Dənizdən, səmadan soruşdum, kimsiz siz?” Məşqçisizsə, niyə məşqçi kimi çalışmırsız, qazandığınız uğurlarla qürrələnmirsiz? Rəhmətlik Böyükağa Hacıyev həmişə meydan üçün darıxdığını deyər, yağa bilməsə də, guruldayardı. Hiss edirdin ki, çalışmaq, işləmək, məşqçilik etmək istəyir. Kabinetdə oturub, məmurluq etmək, gününü qeybətlə keçirmək, AFFA-nın çaldığı havaya oynamağın müqabilində hər ay kartına köçürülən pulu alıb, gününü keçirmək onluq deyildi. Bəlkə də Vahabzadə də, Diniyev də, Mircavadov da, Qəribov da, lap elə Sadıqov da indiki halından məmnun deyillər, ürəklərinin dərinliklərində düşdükləri duruma, onları bu günə salanlara lənət oxuyurlar. Amma səslərini çıxara bilmirlər. Kiriyib, yerlərində oturublar. Eynən Fatı kimi. “Qalx” deyəndə qalxacaqlar, “otur” deyəndə oturacaqlar. Tale onlarla o qədər pis zarafat edir ki, axırda gəlib Obradoviçi də alqışlamağa razılıq verir, boyunlarını büküb, şəkil çəkdirirlər.
Hamısından ayrı-ayrılıqda soruşsan ki, 41 yaşlı Obradoviçin hansı keyfiyyətlərinə bələdsiz, hansı oyunda futbolçu, yaxud da məşqçi kimi istedadını görmüsüz, sakitcə qımışacaqlar. Və bu gün onların qımışması, başlarını aşağı salıb susması sayəsində Elxan Məmmədov yığmaların, ümumilikdə futbolumuzun başına istədiyi oyunu açır. Azərbaycan millisi o qədər ucuzlaşdırılır ki, onun baş məşqçisi postu hələ öz ölkəsində bərkə-boşa düşməmiş bir əcnəbiyə həvalə olunur. Azərbaycan millisinə Rusiyanın, Türkiyənin və Ukraynanın ikinci, Almaniyanın üçüncü, İngitlərənin isə lap beşinci divizionunda çıxış edən, bizimlə yaxından-uzaqdan əlaqəsi olmayanların doldurulması prosesi isə yeni sürət götürüb. Son bir ildə bu prosesin səngiyəcəyinə, yığmamızın formasına və dövlətimizin pasportuna hörmət qoyulacağına kövrək ümidlərimiz yaranmışdı. Artıq həmin ümidləri də darmadağın ediblər. Yığmada dünyanın hər yanından tapdıqları fitri istedadları oynadacaqlar, təkcə öz balalarımızdan başqa. Çünki azərbaycanlı balaları onlar üçün qazanc mənbəyi deyil. Onlar bu məmləkətdə “azərbaycanlıdan futbolçu olmaz, Azərbaycandan məşqçi çıxmaz” kimi xəstə və mənfur fikirləri beyinlərə yeritməkdə israrlıdılar.
Məşqçilər Komitəsinin üzvləri “salla başı, al maaşı” prinsipi ilə susmaqda, hazırda iş başında olan futbol adamları iş yerinin əldən çıxması qorxusuyla ağzını qıfıllamaqda, işsiz olanlar da heç olmasa, gələcəkdə iş tapmaq ümidiylə özünü lallığa və karlığa vurmaqda olsunlar. Sizə kimdən danışım, 21 yaşadək futbolçulardan ibarət yığmanın baş məşqçisi Milan Obradoviçdən. Onun başçılığı altında komandamız artıq ilk sınağını verib. Bizimkilər Antalyadakı toplanış çərçivəsində “Spartak”ın ikinci komandasıyla qarşılaşıb və oyun qolsuz heç-heçə ilə başa çatıb. “Siftə”si “quru” olan serbiyalı mütəxəssis küləkdən, əlverişsiz hava şəraitindən şikayətlənib. Guya ki, hava günəşli olsaymış, onun meydana buraxdığı futbolçular rusları topa tutacaqmışlar, Moskva klubunun qapı toru dəlik-deşik olacaqmış. Obradoviç serbiyalı olsa da, zəif damarımızı tez tuta bilib. Nəticə yoxdusa, havadan şikayətlən, gələcəkdə daha yaxşı olacağını de. Qalan şeylər onsuz da düzələn deyil. Azərbaycan xalqı dözümlü xalqdı. Narahat olma, cənab Obradoviç, futbol ictimaiyyəti isə daha dözümlüdü.