“Fənərbaxça”nın qapısına yol tapan futbolçunun forması xatirə hədiyyəsi kimi verildi”
"Neftçi” ilə "Bursaspor” arasında əməkdaşlıq protokolu imzalanıb. Srağagün baş tutan imzalama mərasimində "ağ-qaralar”ın prezidenti Kamran Quliyev, vitse-prezident Elnur Eyvazov, qardaş ölkə təmsilçisinin prezidenti Əli Ay, vitse-prezident Cem Öztürk iştirak edib. Tədbirə flaqmanın Media və Marketinq Departamentinin rəhbəri Rüstəm Allahverdiyev, həmçinin "Bursaspor”un İdarə Heyətinin üzvləri – Ərkan Aydəmir, Onur Özselek və Ömər Faruk Şahin də qatılıb.
Öncə Əli Ay "Neftçi” rəhbərliyini salamlayaraq, bu əməkdaşlığın uğurlu olmasını arzulayıb: "Neftçi” Azərbaycanın köklü və titullu klubudu. Bunadək əməkdaşlıq protokolu ilə bağlı danışıqlar aparırdıq. Bu gün isə həmin protokolu bağlamaq üçün bir araya gəlmişik. "Neftçi” rəhbərliyi "Fənərbaxça” ilə superliqa oyununda qonağımız oldu. Stadionumuzu, xüsusilə də "Goldsit 1963” tribunamızı çox bəyəndilər. Təkcə idman yox, bir çox məsələlərdə də əməkdaşlıq edəcəyik. Reklam, marketinq, media, mağaza və seleksiya məsələlərində də fikir mübadiləsi aparıb, işlər görəcəyik. Bir-birimizə faydalı olacağıq”.
Ardınca Kamran Quliyev "Bursaspor”un rəhbərliyinə və İdarə Heyətinin üzvlərinə təşəkkür edib: "Bizim üçün qürurverici andı. Belə bir klubda sizinlə əməkdaşlıq edəcəyimiz üçün şadıq. Qardaş ölkədən gəlmişik. Azərbaycanın ən böyük və ən köklü klubuyuq. Müstəqillik dönəmidə 8 dəfə çempionluq sevinci yaşamışıq. Dünən "Bursaspor”un oyununu (bazar ertəsi “Fənərbaxça” ilə 1:1 başa çatan matçı nəzərdə tutur – F.) izlədik. Möhtəşəm stadiona və azarkeşlərə maliksiz. Sizdən öyrənməli çox şey var. Əlaqələrimiz davam edəcək. Gələcəkdə də birlikdə işlər görəcəyik. Sizi Bakıda görmək istərdik”.
Daha sonra hər iki klub başqanı bir-birinə hədiyyə edib. Kamran bəy “Bursaspor” prezidentinə üzərində “Ali Ay” yazılmış “16” nömrəli (Bursanın şəhər seriyası 16-dı) futbol köynəyi bağışlayıb. Əli Ay isə ona “timsahlar”ın yarımmüdafiəçisi Aytaç Karanın “35” nömrəli formasını hədiyyə verib. Təbii, Quliyevə məhz bu futbolçunun formasının bağışlanması maraqlı məqamdı. Odu ki, həm əməkdaşlıq müqaviləsinin detalları haqda daha ətraflı bilgi, həm də hədiyyə ilə bağlı sualımıza cavab almaq üçün Rüstəm Allahverdiyevlə əlaqə saxladıq: “Bu müqavilə iki klub arasında bütün sahələrdə əməkdaşlıq üçün nəzərdə tutulub. Media və marketinq, satınalma, komandalar və akademiyalar arasındakı əlaqələr, məşqçilərin fikir mübadiləsinin aparılması kimi məsələlərdə işbirliyimiz olacaq. Şəxsən bizim departament artıq “Bursaspor”la fikir alış-verişinə başlayıb. Onların telekanalı var və bu yöndə də görüşlərimiz davam edir. Həmin sahədə Türkiyə təmsilçisinin daha böyük təcrübəsi olduğundan məsələhətlər alırıq. Xüsusən də bu iki klubun akademiyası arasında əlaqələr daha sıx qurulacaq. Gələcəkdə bizim aşağı yaş qruplarında olan istedadlı uşaqlar “Bursaspor”un düşərgəsinə yollanacaq və orda müəyyən müddət qalacaq, məşq edəcəklər, hansısa turnirlərdə birgə iştirak edəcəklər. Onların akademiyasında çalışan mütəxəssislər Bakıya gələcək, bizim aşağı yaş qruplarında çalışan məşqçilərlə fikir mübadiləsi aparacaqlar. Bir sözlə, klublar arasında bütün sahələrdə əlaqələr qurulub və qarşılıqlı şəkildə davam edəcək. O ki qaldı verilən formaya, biz “Bursaspor” - “Fənərbaxça” oyununa dəvət olunmuşduq. Matçdan öncə klub rəhbərliyi ilə görüşdük, birgə şam etdik və daha sonra qarşılaşmanı izləməyə yollandıq. İştirak etdiyimiz matçdan xatirə qalsın deyə, “Fənərbaxça”nın qapısına yol tapan futbolçunun forması xatirə hədiyyəsi kimi verildi”.
FARİZ
