Canlı bağlantılar, müsahibələr və 2 saatlıq veriliş də planlaşdırılıb
Klublarımızın Antalyada təlim-məşq toplanışında olduğunu, hələ ki heç birinin geri qayıtmadığını bilirsiz. Özü də hazırda komandaların başı yoldaşlıq oyunlarına qarışıb. Demək olar, hər gün hansısa təmsilçimiz sınaq matçı keçirir. Düzdü, Antalyadakı hava şəraiti yoxlama oyunlarının bəzən təxirə salınmasına səbəb olur. Yaxud da rəqib komandaların planlarının dəyişməsi bizimkilərin hazırlıqla bağlı proqramına təsir edir. Bununla belə, artıq bir sıra görüşlər baş tutub və qarşıdakı günlərdə daha bir neçə yoldaşlıq oyunu bizi gözləyir. Belə deyək, komandalar qış təlim-məşq toplanışının son mərhələsindədi. Odu ki, taktiki və texniki baxımından bugünlərdə baş tutan yoldaşlıq oyunları böyük önəm daşıyır.
Geridə qalan müddətdə sınaq matçlarından bəzilərini izləyə bilmişik. Yox, klublardan heç birinin saytı Antalyadan canlı yayın təşkil etməyib. Təmsilçilərimizin internet səhifəsi uzağı matçın video-icmalını bölüşüb. Ancaq hazırda PFL rəhbərliyi və texniki heyəti də qardaş ölkədədi. Təşkilatçı qurum “yutub” kanalı vasitəsilə klublarımızın bir neçə matçını çəkib, yayınlayıb. Qarşıdakı günlərdə də PFL bu xidmətini azərbaycanlı azarkeşlərdən əsirgəməyəcək. Lakin artıq oyunların yayını telekanalla razılaşdırılacaq. Daha doğrusu, 4 matçın PFL-in “yutub” kanalında göstərilməyəcəyi dəqiqdi. Çünki həmin oyunları ekranlara daşımağı “CBC Sport” öhdəsinə götürüb. Təşkilatçı qurum isə son bir həftəyə təsadüf edəcək, adı çəkilən telekanal tərəfindən yayınlanmayacaq görüşlərdən bəzilərinə çəkiliş qrupu göndərəcək.
Qeyd etdiyimiz kimi, premyer-liqanın yayın hüququna malik “CBC Sport” 4 sınaq qarşılaşmasını tamaşaçılara nümayiş etdirəcək. Bu gün Bakı vaxtı ilə saat 16.00-da sözügedən telekanal “Sumqayıt” – “Vardar” matçını yayınlayacaq. Sabah “Neftçi” – “Slovan” matçına baxmaq istəyənlər saat 16.30-dan etibarən “CBC Sport”u izləsinlər. Yanvarın 24-də “Qəbələ” – “Fakel”, 26-da isə “Qarabağ” – “Şaxtyor” görüşləri həmin telekanalda canlı göstəriləcək. Qeyd etdiyimiz hər iki oyun saat 18.00-da başlayacaq.
Lakin “CBC Sport” təkcə sınaq matçlarını yayınlamaqla kifayətlənməyəcək. Bundan başqa, Antalyadan canlı bağlantılar və “Xəbərlər” üçün müsahibələr də nəzərdə tutulub. Hətta telekanalın qardaş ölkədən 2 saatlıq veriliş nümayiş etdirmək planı da var. Bir sözlə, “CBC Sport” klublarımızın Antalyadakı son hazırlıq dönəmini azarkeşlərə daha yaxından çatdırmaq fikrindədi.
FARİZ