Daha üç yığmanın baş məşqçi məsələsi müzakirə olunur
Ötən sayımızda AFFA-nın millilərlə bağlı siyasətində dəyişiklik etmək qərarına gəldiyini xəbər vermişdik. Daha dəqiqi, bu haqda oxu.az saytı məlumat yaymışdı. Qeyd olunmuşdu ki, ötən ilin əvvəlində yaradılan 16, 18 və 20 yaşadək futbolçulardan ibarət yığmalar ləğv olunub. Onu da bildirək ki, keçən il U-16-nı Azər Məmmədov, U-18-i Zaur Həşimov, U-20-ni isə Rəşad Sadıqov çalışdırırdı. Qurban Qurbanovun istefası ərəfəsində adıçəkilən baş məşqçilərlə də yollar ayrıldı. Özü də bu üç milli özündən bir pillə yuxarı yığma üçün futbolçu hazırlamaq üçün yaradılmışdı.
İnformasiyanı dəqiqləşdirmək üçün hələ srağagün assosiasiyanın Mətbuat və İctimaiyyətlə Əlaqələr Departamentinin rəhbəri Firuz Abdulla ilə əlaqə saxlamışdıq. O, yalnız dünən məsələylə bağlı dəqiq məlumat verə biləcəyini söylədi. Odu ki, dünən yenidən Firuz bəyə müraciət etdik. Məlum oldu ki, həmin xəbər həqiqəti əks etdirmir: "Qeyd etdiyiniz yığmalar ləğv olunmayıb. Sadəcə, hazırda onların baş məşqçiləri yoxdu. Və həmin komandalara baş məşqçi təyin olunması istiqamətində proses gedir, müzakirələr aparılır".
FARİZ