Ötən il dekabrın ilk günündə keçirilən “Sabah” – “Neftçi” oyununda yaşananlara görə Baş Mütəşəkkil Cinayətkarlıqla Mübarizə İdarəsinə dəvət olunan “Forza Neftçi”nin rəhbəri Sübhan Əliyev dindirildikdən sonra sərbəst buraxılmışdı. İzahatı alınan və müəyyən tapşırıqlar eşidən qrup rəhbəri mümkün iğtişaşdan ehtiyatlanaraq “Sumqayıt”la hər iki kubok oyununda özünün və yoldaşlarının qrup halında stadionda olmasını məqsədəuyğun saymamışdı.
“Neftçi”nin 15-ci turda “Qarabağ”la prinsipial oyuna çıxacağını nəzərə alıb təxminən iki həftə əvvəl Sübhan Əliyevlə yenidən əlaqə saxlamışdıq. Lakin o bizə həmin gün “Azərsun Arena”da olub-olmayacaqlarını deməkdə çətinlik çəkdiyini söyləmişdi. Məsələyə yanvarın 20-də, ən pis halda 21-də aydınlıq gəlməliydi. Deyilən vaxt yetişdiyindən, Əliyevlə dünən yenidən əlaqə saxladıq: “Dünən (srağagün) qrupun 150-yə yaxın üzüylə 20 Yanvar şəhidlərini anmaq üçün Şəhidlər Xiyabanına yollanmışdıq. Lakin həmin gün bu məsələ ilə bağlı söhbətimiz olmadı. Bu gün (dünən) də bəzi uşaqların vacib işləri olduğundan, görüşümüz ayın 22-nə qaldı”.
HƏBİB