Növbədə Vaqif Sadıqovla Yaşar Vahabzadədi
Srağagün “Sabah”la “MTK Budapeşt” arasında baş tutan yoldaşlıq görüşünü izləyənlər arasında Şahin Diniyev də olub. Qarşılaşmanın ilk hissəsini izləyən ata Diniyev “tələbələr”in şərəfini qoruyan iki oğlunu – Kərimlə Coşqunu meydanda görməyincə, fasilədə stadionu tərk edib.
Düşünmək olardı ki, Şahin bəy övladlarının çıxışını izləmək üçün Bakıdan Antalyaya uçub. Hətta Coşqunun “Qarabağ”dan “Sabah”a keçidi zamanı təcrübəli mütəxəssisin Türkiyədə olduğunu da ehtimal etdik. Düzdü, Diniyev həm də Məşqçilər Komitəsinin üzvüdü. Yəni AFFA rəhbərliyinin təyinatı əsasında Antalyaya yollanması da istisna deyil. Amma belə bir hal yaşansaydı, qurumun saytında məlumat verilərdi, komitə üzvlərinin kurort şəhərinə ezam olunması haqda xəbər paylaşılardı. Şənbə günü, hətta dünən də AFFA-nın saytını diqqət mərkəzində saxlasaq da, Məşqçilər Komitəsinin üzvləri ilə bağlı bilgiyə rast gəlmədik.
Belədə Türkiyədə olan Şahin Diniyevlə əlaqə saxlayıb, bizi maraqlandıran suala cavab tapdıq: “AFFA-nın Məşqçilər Komitəsinin xətti ilə gəlmişik. Oteldəki otağa elə indi girdim. Şakir Qəribovla gəlmişik, yanvarın 25-nə qədər burdayıq. 25-dən 31-nə qədər isə Vaqif Sadıqovla Yaşar Vahabzadə burda olacaq. Ağasəlim Mircavadovun səhhətində problem var deyə, gəlməsi məqsədəuyğun sayılmadı”.