Cavid Qarayev: “VAR sistemi Avroliqanın BOS-da keçiriləcək final oyununda tətbiq olunacaq”
Hələ ideya olaraq araya-ərsəyə gəldiyi vaxtdan indiyədək VAR sistemi müzakirə olunur. Ədaləti bərpa etmək baxımından müsbət cəhəti danılmaz olsa da, bəziləri hələ də onun futbolun gözəlliyinə, oyunun tempinə xələl gətirdiyini düşünür. Hər halda, bu sistem yavaş-yavaş kütləviləşməkdədi. Əslində Rusiyada keçirilən dünya çempionatı VAR-la bağlı tərəddüdlərə son qoydu. Elə mundialdan sonra “böyük beşlik” ölkələrinin dördündə həmin sistemin tətbiq olunması da VAR-ın uğurlu olmasının təsdiqidi. Yalnız İngiltərə bu mənada istisnadı ki, növbəti mövsümdən videotəkrardan “futbolun vətəni”ndə də istifadə olunacaq. Özü də britaniyalılar Liqa kubokunda sözügedən texnologiyadan istifadə edirlər. Həmçinin qonşu Türkiyə, Hollandiya, Çexiya, Belçika, Polşa, Portuqaliya və Avstraliyada VAR-dan yararlanırlar. Rusiya da İngiltərə kimi növbəti mövsümdən onu tətbiq edəcək. İsrail, İsveçrə kimi ölkələrin də videotəkrardan istifadədə maraqlı olduğu deyilir. Bir sözlə, sistemin get-gedə əksər çempionatları “ağuşuna alacağı” gözlənilir.
Əlbəttə, texnologiya uğurludusa və çoxları buna maraq göstərirsə, onun tam sürətlə yayılmamasının səbəbi sual doğura bilər. Məsələ burasındadı ki, VAR yetərincə bahalı sistemidi. Təkcə Rusiyada keçirilən mundial zamanı bu texnologiyanın hər stadiona 1,2 milyon dollara başa gəldiyini xatırlatmaq kifayətdi. Düzdü, ölkə çempionatı səviyyəsində maliyyə baxımından rəqəm çox aşağı ola bilər. Məsələn, Hollandiyada çempionatın 306 oyununda VAR-dan yararlanmaq üçün təxminən 2,5-3 milyon avro xərclənəcəyi haqda xəbərlər yayılmışdı. Bununla belə, sistem heç də ucuz deyil.
Bəs görəsən, bizdə onun tətbiqi nə vaxt gerçəkləşə bilər? Yadınızdadısa, bir müddət öncə AFFA Hakimlər Komitəsinin sədri Frits Stuxlik müsahibəsində videotəkrarla bağlı sualı belə cavablamışdı: “VAR gələcəyin sistemidi. Azərbaycanda bunu tətbiq etmək üçün maraqlı olan tərəf bu texnologiyanın vacibliyi və zərurəti ilə razılaşmalı, xərcləri üzərinə götürməlidi. Artıq bu məsələnin müzakirəsinə başlamışıq və yeni sistemi tətbiq edəcəyimiz vaxtı səbirsizliklə gözləyirik”.
Bu isə o deməkdi ki, sistemdən ölkəmizdə istifadə elə də uzaq gələcək sayılmır. Burda başqa bir sual ortaya çıxır: stadionlarımızda VAR-ın tətbiqi üçün lazımi şərait varmı? Nəzərə alaq ki, hətta oyunların çəkilişi zamanı bizim arenalarda bəzən problemlərə rast gəlinir. Deməli, həmin texnologiyanın qurşadırılması üçün də stadionlarımızda görüləcək işlər yetərincədi.
Onu da qeyd edək ki, UEFA 1/8 final mərhələsindən etibarən həm ÇL, həm də AL oyunlarında VAR-dan istifadəyə icazə verəcək. Avroliqanın builki finalının Bakı Olimpiya Stadionunda (BOS-da) keçiriləcəyini nəzərə alsaq, deməli, ölkənin ən nəhəng arenasında da həmin sistem quraşdırlacaq. Maraqlıdı, bunun üçün stadionda nələrə ehtiyac var? Arenada əlavə nələr quraşdırılmalıdı? Bütün bunlarla bağlı BOS-un direktoru Cavid Qarayevin fikirlərini öyrəndik: “VAR sistemi Avropa Liqasının BOS-da keçiriləcək final oyununda tətbiq olunacaq. Bununla bağlı UEFA nümayəndələri ötən il Bakıda idi, növbəti səfər isə fevralda gözlənilir. Beləliklə, bu məhz UEFA-nın tövsiyəsidi. VAR sistemi TV-yayın ərazisində olan elektrik qovşağından birbaşa siqnal qəbul edəcək. Sistemin uğurlu tətbiqi üçün müvafiq kabellərdən istifadə olunacaq, BOS-da kabel panelləri qazonun ətrafinda quraşdırılıb və artıq texniki testlərdən keçirilib. VAR sistemi ilə bağlı ətraflı məlumatı UEFA-nın fevraldakı səfərindən sonra paylaşacağıq”.
FARİZ
