Futzal üzrə ölkə çempionatında dövrələrarası fasilə gələn həftə başa çatır. Əslində fasilə yalnız yüksək liqa təmsilçiləri üçün olub. Birinci və ikinci liqa komandaları isə kubokun 1/32 final mərhələsi çərçivəsində güclərini sınayıblar. Bu arada yüksək liqada 15-ci turun oyun cədvəli artıq açıqlanıb. 2019-cü ilin ilk turu iki gün ərzində keçiriləcək. İki oyun yanvarın 25-də, turun mərkəzi qarşılaşması isə 29-da oynanılacaq. Oyunlar Bakı İdman Sarayında keçiriləcək. “Xəzər Cənub” – “Neftçi” qarşılaşmasının 4 gün sonraya salınmasının səbəbinə gəlincə, “ağ-qaralar” Gürcüstana toplanışa gedir. Paytaxt təmsilçisi əvvəlcədən məktubla federasiyaya müraciət edib ki, yanvarın 26-27-si Bakıya dönəcəklər. Təşkilatçılar da onların xahişini nəzərə alıb. Həm də “CBC Sport” ayın 25-də reallaşacaq qarşılaşmaları yayınlaya bilmir. Amma 29-da yayın imkanı yüksəkdi.
Yeri gəlmişkən, 3-cü dövrənin açılış turunu iki futzalçı buraxacaq. “Araz”ın “Yasamal” MFK-dan yeni transferi Sadiq Cavid qış fasiləsinə qədər 4 sarı vərəqə limitini doldurduğuna görə debütünü bir tur sonraya saxlamalıdı. “Yasamal” MFK-nın daha bir sabiq üzvü, “Neftçi”yə transfer olunan Salar Şahnazi də maraqlı oyunun iştirakçısı ola bilməyəcək. O da Sadiq kimi 4 sarı vərəqə limitini doldurub.
Yasamal MFK Baku – Araz
25 yanvar. Bakı İdman Sarayı. Saat 15.30
Yasamal İSK – Liman
25 yanvar. Bakı İdman Sarayı. Saat 17.30
Xəzər Cənub – Neftçi
29 yanvar. Bakı İdman Sarayı. Saat 14.30