Əsas komanda günü bir məşqlə başa vurdu
Antalyada təlim-məşq toplanışını davam etdirən “Sumqayıt” dünən günü bir məşqlə yekunlaşdırıb. Baş məşqçi Ayxan Abbasov kollektivi iki qrupa bölüb. Belə ki, "Jetisu" ilə yoxlama oyununda ilk “11-lik”də meydanda olanlar yüngül qaçış və fiziki təmrinlərlə kifayətlənibsə, meydana sonradan çıxanlar müxtəlif toplu çalışmalar edərək, 1 saat hazırlıq keçib.
“Kimyaçılar”ın əsas komandası kimi, “ikincilər”in də toplanışı davam edir. Qış fasiləsinə birinci divizionun lideri kimi yollanan “Sumqayıt-2” hazırlıq çərçivəsində dünən “Kapital Bank Arena”nın süni meydanında Region Liqasının iddialılarından “Uğur”la münasibətləri aydınlaşdırıb. Soyuq hava və güclü küləyin müşayiəti altında keçən görüşdə qalib müəyyənləşməyib. Elbrus Məmmədovun yetirmələri Məhəmməd Alıyevlə iki dəfə rəqib qapısının torunu silkələsə də, qələbə hesabını qoruya bilməyiblər. Qəzənfər Abbasovun çalışdırdığı həvəskar kollektiv hər qolun əvəzini çıxa bilib və qarşılaşma 2:2 hesabıyla bitib.
Xatırladaq ki, “ağ-göylər”in əvəzedici komandası qarşıdakı günlərdə daha 4 yoxlama görüşü keçirməyi planlaşdırır. “Kimyaçılar” yanvarın 24-də Region Liqasının daha bir təmsilçisi "Şahdağ", 26-da "Qarabağ-2", 31-də isə "Səbail-2" ilə üz-üzə gələcək. Beşinci rəqibin kimliyinə yaxın günlərdə aydınlıq gələcək.
RƏŞAD