“Superliqaya çıxa bilməməyimiz məni kədərləndirdi”
2016-nın yayından 2017-nin dekabrına qədər “Qarabağ”ın şərəfini qoruyan və bu müddətdə həm çempionluq, həm kubok sevinci yaşayan, üstəgəl, “köhlən atlar”ın Çempionlar Liqasının qrup mərhələsinə yüksəlməsində böyük əmək sahiblərindən olan Dino Ndlovu karyerasını Çində davam etdirir. Ötən ilin yanvarında “Qarabağ”ı Çinin 2-ci liqa təmsilçisi “Xançjou Qrintaun”a dəyişən 29 yaşlı forvard getdiyi ölkədə olduqca xoşbəxtdi.
Dino yerli mətbuata verdiyi açıqlamada indiki durumundan və gələcəkdəki hədəfindən söz açıb: “Karyeramda heç vaxt bir mövsümdə bu qədər qol vurmamışdım. Bura gələndə məndən çox şey gözləyirdilər. Oyunumla hamının cavabını verdim. Hətta deyərdim ki, bundan da artığını etdim. Hər il oyunçu keyfiyyətlərimi daha da yaxşılaşdırmaq istəyirəm. Xüsusilə də komandamı yeni mövsümdə superliqaya çıxarmaq arzusundayam. Bu qədər yaxşı çıxış etdiyimiz mövsümdə superliqaya çıxa bilməməyimiz məni kədərləndirdi. Bu barədə özümə çox sual verdim. Amma nəzərə almaq lazımdı ki, yeni komandayıq. Artıq daha təcrübəliyik və hədəfimiz elitaya yüksəlməkdi. Çinə yeni gələndə ciddi dil problemi ilə üzləşdim. Ancaq indi fikrimi ifadə edə və bəzi cümlələri başa düşə bilirəm. Burda oynamaq mənə başqa mədəniyyətlərə hörmət və məsuliyyət hissini öyrətdi. Hər anımdan zövq alıram. Bir çox Çin yeməyinin dadına baxmışam və demək olar ki, hamısını sevirəm".
Qeyd edək ki, Dino 2018-ci ildə meydana çıxdığı 24 çempionat görüşündə rəqib qapılarına 19 dəfə yol tapmağa nail olub. Bu göstəriciyə görə komandasının ən məhsuldar oyunçusu sayılır.
HƏBİB