2001-02-ci il təvəllüdlü futbolçulardan ibarət yığmanın təlim-məşq toplanışı olacaq. Hazırlıq prosesi yanvarın 14-dən 20-dək Bakıda reallaşacaq. Yeni baş məşqçi Samir Əliyevin rəhbərliyi altındakı ilk toplanışda milli üç yoxlama oyunu keçirəcək. Bu komanda yanvarın 15-də Avropa çempionatının elit mərhələsinə hazırlaşan U-19-la, yanvarın 17-də və 20-də isə uyğun olaraq “Baku City” və “Keşlə-2” ilə qarşılaşacaq. Əliyev toplanışa 23 futbolçu dəvət edib: Əkbər Vəliyev, Cavid Əliyev, Ceyhun Nuriyev (hamısı “Keşlə”), Nicat Verdiyev (Kəpəz), Ayxan Arazlı, Nihad Quliyev (hər ikisi “Qarabağ”), Elməddin Sultanov, Xəyal Muradov, Təbriz İsazadə, Nicat Əliyev, Veysəl Rzayev, Məhəmməd Məhərrəmov (hamısı “Qəbələ”), Nihad Qurbanlı, İnqilab Əkbərov, İlkin Əbiyev, Mehdi Tahirov, Nicat Məmmədov (hamısı “Neftçi”), Raul Həsənzadə, Elşad Tağıyev, Xəlil Bəşirov (hamısı “Səbail”), Səbuhi Abdullazadə (Sumqayıt), Elçin Qasımov (Turan Tovuz), Zahir Xanhüseynli (Zirə).
Əslində Samir bəyin çalışdırdığı komanda da U-19-du. Sadəcə, hər iki yığma eyni yaş qrupu kimi təqdim olunsa, anlaşılmazlıq və anormallıq yaranar. Məhz bu üzdən Əliyevin komandası təvəllüdlə göstərilib. Vüqar Məmməd isə U-19-u elit, bacarsa, final mərhələsinə çıxardıqdan sonra yığmadan ayrılacaq. Həmin andan etibarən Əliyevin rəhbərlik etdiyi komanda təvəllüdlə göstərilməyəcək, U-19 adlanacaq.