Obradoviçin U-21-ə təyinatı isə an məsələsidi
Əsas yığmanı və U-21-i yenidən əcnəbilərin ixtiyarına verməyə hazırlaşan AFFA rəhbərliyi artıq prosesin son mərhələsinə qədəm qoyub. Assosiasiyaya yaxın mənbənin dediklərinə inansaq, qurum əsas millini çalışdırmağa iki əsas namizəd üzərində dayanıb. Hazırda onlar arasında seçim gedir, danışıqların son mərhələsi sürətləndirilib. Martda Xorvatiya ilə keçiriləcək oyunu nəzərə alan başbilənlər məsələyə yanvarın 15-nə qədər son qoymaq niyyətindədi. Mütəxəssislərin konkret hansı ölkədən olduğunu demək çətin olsa da, Avropanı təmsil etdikləri gün kimi aydındı. Hər ikisi ortayaşlıdı.
U-21-ə gəlincə, artıq xeyli müddətdi Milan Obradoviçlə danışıq aparan AFFA-nın məsul şəxsləri istəyinə çatmaq üzrədi. Futbolçu olduğu dönəmdə Rusiyada “Lokomotiv”in, Ukraynada “Metallist”lə “Arsenal”ın formasını geyən sabiq müdafiəçi ingilis dili ilə yanaşı, ruscanı da yaxşı bilir. Məşqçi kimi sonuncu iş yeri Serbiyanın U-19-u olan Obradoviçin artıq Bakıda olması haqda xəbərlər dolaşır. Yekun söhbət üçün ölkəmizə təşrif buyuran 41 yaşlı mütəxəssisin bu gün, ən pis halda növbəti həftənin ilk iki iş günündə rəsmi müqaviləyə imza atacağı gözlənilir.
Eşitdiklərimizi dəqiqləşdirmək üçün əlaqə saxladığımız AFFA-nın Mətbuat və İctimaiyyətlə Əlaqələr Departamentinin rəhbəri Firuz Abdulla əsas yığmanın baş məşqçisi mövzusunda məlumatsız olduğunu bildirdi. Obradoviçə gəlincə, aldığımız cavab belə oldu: “Obradoviçin məsələsinə yaxın günlərdə aydınlıq gələcək. Hələ ki konkret bir şey yoxdu”.
Maraq üçün qeyd edək ki, dekabrda U-19 istisna olmaqla bütün yaş qruplarından ibarət millilərin baş məşqçilərini istefaya göndərən AFFA rəhbərliyi heç bir komandaya idarəçi tapmayıb. Yalnız elit raundun oyunlarından sonra yola salınacaq Vüqar Məmmədi Samir Əliyevin əvəzləyəcəyi dəqiqləşib.
HƏBİB