Sizin reklam burada

Voleybol Federasiyası hələ də qərar verməyib

Baxış Sayı:514

Voleybol Federasiyası hələ də qərar verməyib
Yığma yerli məşqçiyə tapşırılacaq
Hazırda ölkənin iki əsas komandası “başsızdı”. AFFA hələ də Qurban Qurbanovun boşaltdığı posta baş məşqçi təyin etməyib. Rəsmilər müxtəlif variantları nəzərdən keçirir. Qadın voleybolçulardan ibarət yığmanın “sükan”ı da uzun müddətdi boşdu. Dünya çempionatının gedişində səhhətində ciddi problemlər yaranan Faiq Qarayev həkimlərin də məsləhəti ilə məşqçi karyerasına son qoydu. Bir müddət Türkiyədə müalicə alan mütəxəssis Bakıdadı və federasiyanın vitse-prezidenti postunda fəaliyyətini davam etdirir. Onu kimin əvəzləyəcəyinə isə hələ də aydınlıq gəlməyib. Halbuki Qarayev qardaş ölkədən qayıdandan sonra iclas olmalı, komandanın mundialdakı çıxışı müzakirəyə çıxarılmalı və yeni baş məşqçinin kimliyi dəqiqləşməliydi.
Dünya çempionatına Faiq bəyin köməkçisi qismində yollanan, hətta məlum səbəblərdən onun yoxluğunda komandanı bir neçə oyuna çıxan Famil Ağayevdən əldə etdiyimiz bilgiyə görə, rəhbərlik səviyyəsində iclas olmayıb. Bununla belə, mütəxəssis yığmanın böyük ehtimalla yerli məşqçiyə tapşırılacağını söylədi: “Hələ ki rəhbərlik səviyyəsində iclas olmayıb. Bu üzdən baş məqşi məsələsi açıq qalır. Bildiyim qədər əcnəbi məşqçidən söhbət getmir. Böyük ehtimalla yığma yerli mütəxəssislərdən birinə tapşırılacaq”.
Özünün namizədliyi ilə bağlı isə Ağayev bunları deməklə kifayətləndi: “Düzdü, mən 8 ildi yığmada işləyirəm. Bütün oyunçuları da yaxşı tanıyıram, nəyə qadir olduqlarını bilirəm. Amma təbii ki, qərarı rəhbərlik verəcək”.
32 yaşlı mütəxəssislə söhbətdə rəhbərlik etdiyi “Azərreyl” haqda da informasiya aldıq: “Bildiyiniz kimi, ölkə çempionatında ilk tur arxada qaldı. Hazırda komanda məşqləri davam etdirir. Heyətlə bağlı heç bir yenilik yoxdu. Yerli gənc voleybolçularla yola davam edirik”.
KƏNAN HƏSƏNOV

Oxşar xəbərlər
SON XƏBƏRLƏR