Ceyhun Sultanov: “Evdə nə var idisə, götürüblər”
Ötən ilin son günlərində hakim İnqilab Məmmədovun evinin qarət olunmasından xəbəriniz var. Xatırladaq ki, ədalət təmsilçisinin xanımı “Xəzər” telekanalına açıqlamasında günorta saatlarında evdən çıxdıqlarını, axşam qayıdanda isə evlərinin yağmalandığını gördüklərini demişdi. Evə mətbəxdən daxil olan oğrular 9500 dollar və 6500 manat məbləğində pulu götürüblər. Həmin pullar isə İnqilab bəyin 2 yaşlı xəstə övladı Nərgizin müalicəsi üçün nəzərdə tutulubmuş.
2019-cu ilin ilk günlərində də buna oxşar hadisə baş verib. Bu dəfə oğruların hədəfinə “Neftçi”nin idman direktoru Ceyhun Sultanovun evi tuş gəlib. Əldə etdiyimiz məlumata görə, qarətçilər Ceyhun bəyin ailəsi ilə birgə bayram günlərində ölkə xaricində olmasından istifadə edərək evə giriblər. Onu da qeyd edək ki, Sultanov paytaxtın mərkəzində, məşhur yaşayış komplekslərinin birində yaşayır. Həyət və binanın dörd bir tərəfi daim videonəzarət altındadı. Bundan başqa, həyətin girişində gözətçi köşkü də var ki, 24 saat orda mühafizəçi olur. Belə olan halda yad insanın və yaxud insanların arxayın şəkildə binaya girməsi və evi qarət etməsi təəccüb doğurur. Ancaq bizə çatan məlumata görə, oğrular bu dəfə fərqli taktika seçiblər. Onlar evə göydən, daha dəqiq desək, binanın damından alpinist iplərinin köməyi ilə daxil olublar. Qarətçilər 21-ci mərtəbədən sallanaraq əvvəlcə 19-cu mərtəbədəki mənzilə, ardınca isə “ağ-qaralar”ın idman direktorunun 11-ci mətbədəki evinə daxil olublar.
Yaşananlara aydınlıq gətirmək üçün Ceyhun bəylə əlaqə saxladıq. Sultanov qısa açıqlamasında söylənilənləri təsdiqlədi. Onu da bildirdi ki, artıq iki gündü hüquq-mühafizə orqanlarının əməkdaşları hadisə yerini gözdən keçirir, ətraf binalardakı videomüşahidə kameralarının da yaddaşını incələyirlər: “Polislərin sözlərinə görə, hadisəni törədən şəxs peşəkar oğrudu. Cinayətkar “işini” ustalıqla görüb. O, əvvəlcə fasada yerləşdirilmiş kameranın üzərinə torba keçirib. Üzünü şərflə bağlayıb və gözünün üstünü papaqla örtüb. Oğru, demək olar, əl izi qoymayıb”.
“Ziyan çox olub” sualımıza isə futbol funksioneri qısa cavab verdi: “Evdə nə var idisə, götürüblər. Pul, qızıl, zinət əşyaları, şuba və s.”.
RƏŞAD