AFFA 21 yaşadək futbolçulardan ibarət yığmanın yeni baş məşqçisini müəyyənləşdirib. Məşqçilər Komitəsinin və baş katibliyin birgə fəaliyyəti çərçivəsində U-21-in baş məşqçisi vəzifəsinə müxtəlif mütəxəssislərin namizədliyi müzakirə olunub və həmin məşqçilərlə görüşlər keçirilib. Hazırda bu posta namizəd serbiyalı mütəxəssis Milan Obradoviçdi. AFFA rəsmi saytı vasitəsilə açıqlama verərək, bütün şərtlərlə bağlı qarşılıqlı razılıq əldə ediləcəyi təqdirdə U-21-in baş məqşçisi vəzifəsinin 41 yaşlı Obradoviçə həvalə olunacağını bildirib. Qeyd edək ki, serbiyalı mütəxəssisin son iş yeri əsas yığmada baş məşqçinin köməkçisi vəzifəsi olub.
AFFA həmçinin U-19-da baş məşqçi dəyişikliyinə hazırlaşır. Baxmayaraq ki, hazırda yeniyetmələrə Vüqar Məmməd başçılıq edir. O, millini elit mərhələyə çıxarıb. Bununla belə, Məşqçilər Komitəsinin müvafiq təqdimatına əsasən, son yarım ildə "Səbail"in Futbol Akademiyasında əlaqələndirici vəzifəsində çalışan Samir Əliyev karyerasını yığmada davam etdirəcək. Bu təyinat növbəti seçmə mərhələnin startı ərəfəsində baş tutacaq. Başqa sözlə, Samir Əliyev yalnız növbəti seçmə mərhələdən komandanın baş məşqçisi olacaq. 2019-cu ilin oktyabrında keçiriləcək Avropa çempionatının seçmə mərhələsində iştirak edəcək U-19 gənc mütəxəssisə həvalə olunub. Hazırki baş məşqçi Vüqar Məmməd elit-raundda uğurlu çıxış edib final mərhələsinə vəsiqə qazanacağı təqdirdə komandanın yanında olacaq.