Ötən sayımızda "Zirə"də yeni təyinatın reallaşdığını xəbər vermişdik. Söhbət qəsəbə təmsilçisində bundan sonra baş menecer vəzifəsini Elman Himayətoğlunun yerinə yetirəcəyindən gedir. Xatırladaq ki, Qurban Qurbanovun istefasından sonra yığmanın mətbuat xidmətinin rəhbəri olan Himayətoğlu da millidəki işindən ayrılmışdı. Ancaq Elman bəyin işsiz günləri uzun sürmədi. "Zirə" onun üçün yad klub deyil və Himayətoğlu yığmaya gəlməmiş "qartallar"ın mətbuat katibi idi.
Dünən sabiq həmkramızla əlaqə saxlayıb, yeni işi ilə bağlı fikirlərini öyrəndik. Himayətoğlu qısaca bunları dedi: "Milliyə gedəndə klub rəhbərliyinin razılığı ilə getmişdim. Onlar da yığma naminə bu təyinata müsbət yanaşmışdılar. Millidən ayrılandan sonra da yenidən kluba dəvət etdilər və təbii ki, mənə doğma olan klubda doğma kollektivlə işləmək çox xoşdu. Bu iş mənim üçün yenilik olacaq. Klub rəhbərliyinə etimad göstərdiyi üçün təşəkkür edirəm. Çalışacam etimadı doğruldum".