Mərakeşin ən yüksək zirvəsi olan Tubkal dağının ətrafında iki avropalı turist qətlə yetirilib. Norveç və Danimarkadan olan turistlərin meyitləri dekabrın 17-də səhər fransalı turistlər tərəfindən aşkar edilib. Hər iki alpinistin boyun nahiyəsində bıçaq yaraları olub.
Yox, məqsədimiz sizi heç də kriminal xəbərlə tanış etmək deyil. Dinindən, irqindən, milli mənsubiyyətindən asılı olmayaraq, insan ölümü faciədi. Avropalı turistlərin hücuma məruz qalaraq (hər halda, boyun nahiyələrində bıçaq yarası aşkarlanıb) qətlə yetirilməsi də vəhşilikdi, qəbulolunmazdı. “Futbol+” olaraq, bizi narahat edən məsələ tam başqadı. Diqqətimizi yunan-Roma güləşi yığmamızın üzvü, Avropa və dünya çempionatlarının mükafatçısı, İslam Həmrəyliyi Oyunlarının qalibi İslam Abbasovun hadisəyə reaksiyası çəkdi. 22 yaşlı pəhləvanın yazdıqlarını olduğu kimi diqqətinizə çatdırırıq, mühakiməni özünüz yürüdün: “Bir dənə avropalı ölən kimi bütün saytlar yazır. Dünyada nə qədər müsəlman aclıqdan, atılan güllədən, bombadan ölür, qətl olunur, onlar hanı bəs? Ən böyük qatil elə Avropa, Amerikanın özüdü islam dünyasına. Mən bunlara haqq qazandırmıram, qatildilər, cəzalanmalıdılar. Amma görürsüz necə reklam edirlər srazı”.