Dekabrın 18-de Bakıda qeyri-adi hadisə baş verib. Hadisənin təfərrüatına toxunmamış səbəbkarın adını çəkirik ki, özünüz dərhal hansısa qənaətə gələcəksiz. Bəli, söhbət ölkəmizin bədii gimnastika yığmasının baş məşqçisi Mariana Vasilyevadan gedir. Yadınızdadısa, bolqarıstanlı xanımın yerli mütəxəssislər, eləcə də yeniyetmə idmançılar ilə yola getmədiyini dəfələrlə vurğulamışıq. Amma onun elə güclü himayədarı var ki, xətrinə dəyənlər ən yaxşı halda gözünü təcridxanada açır.
Mariana xanım bu dəfə nə etsə, yaxşıdı?! Deməli, bolqarıstanlı baş məşqçi srağagün idarə etdiyi “Audi-Q3” ilə metronun “Koroğlu” stansiyasının yaxınlığında yerləşən “Bravo” hipermarketinə girib. Qeyri-adi qəzadan sonra maşının dövlət nömrə nişanı çıxarılıb. Gimnastika Federasiyasının mətbuat katibi Bikə Abdullayeva isə olayla bağlı bunları deyib: “Mariana Vasilyeva xəsarət almayıb, salamatçılıqdı. Hazırda o, iş başındadı. Avtomobilə nə qədər ziyan dəyməsi barədə isə heç bir məlumatım yoxdu”.
Elə burdaca yazıya nöqtə qoymaq olar. Amma gəlin ümid edək ki, Marina xanım gələn dəfə pilotluq eşqinə düşməyəcək. Axı hipermarketə “Audi” ilə girən adam üçün prinsipcə “Koroğlu”dan hava limanına uçmaq da problem olmamalıdı!
HUŞƏNG