Bir ölkədə ki azarkeş yoxdu, onun futbolu da ola bilməz. İstəyirsən Messini gətir, ya Ronaldonu, lap Anatoli Banişevski qəbirdən durub gəlsin, xeyri yoxdu. Futbola rəng qatan təkcə meydanda top dalınca qaçanların etdiyi hərəkətlər deyil. Sizi inandırım, tribunalar boş olandan sonra futbolçuların özləri də bunda maraqlı olmayacaq. Çünki onlar şounu azarkeşlər üçün göstərir. Çörəkləri tribunadakılardan çıxır. Azarkeş olmayandan sonra kimdi illik abunə biletlərindən qazanan, kimdi stadionda bannerini yerləşdirən və ya Neymarın, Salahın, Modriçin hansı şirkətin dəstlərindən yararlanmasının nə önəmi? Deməyim odu ki, futbolçular milyonları fanatın sayəsində qazanır.
“Forza Neftçi”nin rəhbəri Sübhan Əliyev “Bandotdel”ə çağırılıb. Hansısa şəxsi məsələyə görə yox ha. Sırf başçılıq etdiyi qrupun tribunadakı əməllərinə görə. Uca səslə qışqırıblarmış, oturacaq sındırıblar, Rəhim Həsənovu söyüblər, hə, bir də ən vacib məqam – hansısa dövlət məmurunu istefaya səsləyiblər.
Həmin oyunu canlı izləyən biri kimi əminliklə deyə bilərəm ki, orda hansısa məmurun ünvanına söyüş işlədilməyib. Kimi söyəcəklər? Həmin gün hava yağışlı olduğuna görə ekologiya və təbii sərvətlər naziri Muxtar Babayevi, yoxsa “Əlincə Arena”nın tikintisi üçün şəhərin mərkəzini yox, Masazırı məsləhət görən paytaxtın sabiq meri Hacıbala Abutalıbovu? İnandırıcı deyil axı. Uzağı Hakimlər Komitəsinin sədri Frits Stuxliki söyərdilər, ən pis halda ölkə futboluna cavabdehlik daşıyan Rövnəq Abdullayevi. Onu da söyə bilməzlər, daha doğrusu, söyməzlər. Çünki hara fırladırsan-fırlat, adam həm də “Neftçi” üçün pul çıxan mənbənin (ARDNŞ) şefidi. Özü də vaxtilə klubun rəhbəri olub, zaman-zaman “ağ-qaralar”a sevgisini göstərib. Baş katib Elxan Məmmədovun təhqir olunması, ya da istefaya səslənməsi ehtimalı ola bilər ki, bu da normaldı. Bu fakt əldə əsas tutulsa, gərək ölkənin ən azı yarısı “Bandotdel”ə dəvət olunsun.
“Bandotdel” – Baş Mütəşəkkil Cinayətkarlıqla Mübarizə İdarəsi (nə sirri-xudadısa, adam adını yazanda belə, ürəyi çırpınır). Adından da göründüyü kimi, bu orqan mütəşəkkil cinayətkarlıqla məşğul olur. Yəni ölkədə iğtişaş yaratmaq istəyənləri saxlayır, odlu silah saxlayanları, alıb-satanları həbs edir, polisin yaxalaya bilmədiyi cinayətkarları aşkara çıxarır, bir sözlə, sanballı işlərlə məşğul olur. Sübhan Əliyev kimi bacarığı boğazını tribunadan yırtmağa bəs edən birini saxlayıb, səhərdən axşama kimi dindirmək, inandırım sizi, orda oturanlar üçün vacib məsələ deyil. Nə var ki, tribunada 50-100 oturacaq sındırıblar, səs-küylərini başlarına atıblar.
Ay başına döndüyüm, həddini aşan azarkeşi tənbeh etməyin yolu var da. Mindirirsən polisin xidməti maşınına, aparırsan bölməyə. İzahatını alırsan, cəriməsini yazırsan, bir az da hədə-qorxu gəlirsən, bəs edir. Sabah yenə eyni adamı saxlayanda qanun çərçivəsində bir az da sərt tədbir görürsən. Bunu hamı bilir də. Odu ki, Sübhanın “Bandotdel”ə çağrılması sıradan işə oxşamır. Mütləq və mütləq futbolun başında duranlardan kimsə adı çəkilən orqana bu barədə məlumat verib, ağız açıb, xahiş edib. Ki, “Forza Neftçi” ölmüş Azərbaycan futboluna rəng qatır, bəzək verir. Onları elə hala salın ki, ya stadiona gəlməsinlər, ya da qışqırmasınlar. Tamaşaya baxıb getsinlər.
Yetər, ay bu işə qol qoyanlar, başında duranlar, ortaya ideya atanlar. Yetər! İllərdi ölkə başçısının futbola ayırdığı milyonlar, bəlkə də milyardlar suya atılıb. Nə futbol var, nə də futbolçu. Bölgə futbolunu məhv etdiz, sponsorları iyrəndirdiz, yığma üzvlərinə haqq etmədikləri yüzminləri, milyonları verib futboldan doydurduz. Yarıtmaz siyasətlə futbolun “anasını ağlatmısız” və hələ də əməlinizdən əl çəkmirsiz. Heç olmasa, tribunalarla işiniz olmasın. İmkan verin, xoş gələcəyə ümid edib stadionlara gələn 100-200 nəfər “qurdunu öldürsün”. Xaricdən gələnlər də tribunalara baxıb elə bilsinlər ki, bizdə də futbol var.
P.S. Sübhanla hər söhbətimdə tribunada söyüş söyülməsinə qarşı çıxdığımı demişəm. Qatı əleyhinəyəm. Çünki mən də öz balamla oyunu stadionda izləmək istəyirəm. Amma bu problemi həll etməyin yolu azarkeşi “Ankara liseyi”ndən bir tin yuxarıdakı beşmərtəbəli binaya çağırmaq deyil axı.