Gələn həftənin cümə axşamı mövsüm rəsmən yarılanacaq. Belə ki, dekabrın 19-da və 20-də ölkə kubokunda 1/4 final mərhələsinin cavab görüşlərindən sonra qış fasiləsi elan olunacaq. Bu gün isə 1/4-ə start veriləcək. Reqlamentə görə, ilk mərhələnin qalibləri bir oyunun nəticəsinə əsasən müəyyənləşmişdisə, bu mərhələnin qalibləri 2 görüşdən sonra bəlli olacaq. İki gün ərzində keçiriləcək qarşılaşmaların iştirakçıları da bir-birnə “tən”di. Belə ki, bu mərhələdə yalnız Topaz premyer-liqası təmsilçiləri mübarizə aparacaq. 1/8-dən mübarizəyə qoşulan divizion təmsilçilərindən heç biri mərhələ adlaya bilmədi. Üz-üzə gələcək cütlərdən birindəki rəqiblər əvvəllər də qarşılaşıb. Digər cütlər ilk dəfə kubokda görüşəcək.
Mərhələnin ilk görüşlərindən üçü Bakıda, biri bölgədə baş tutacaq.
1/4 finala “Dalğa Arena”da start veriləcək. “Zirə” Mərdəkanda “Səbail”i sınağa çəkəcək. Zirəlilərin kubokda uğura daha çox ehtiyacı var. Çünki qəsəbə təmsilçisi çempionatda sonuncu yerdə qərarlaşıb və premyer-liqadan Avropa Liqasına yollanmaq şansı azdı. Kubokda isə yol qısadı. Komanda qışa autsayder kimi yollansa da, “ikinci cəbhə”də qazanılacaq uğur əhval-ruhiyəni bərpa edə bilər. Ancaq “Səbail” də işini ehtiyatlı görməyə çalışacaq. Aftandil Hacıyevin komandası qış fasiləsinə 3-cü yerdə yollansa da, mövsümü məhz mükafatçılar sırasında bitirəcəyi zəmanətli deyil. Komanda bu mərhələni adlasa, təzyiqdən qurtulmuş olacaq.
“Zirə”əvvəlki 4 kubok mövsümündən birincisi istisna olmaqla, son üçündə məhz 1/4-də mübarizəni dayandırıb.“Səbail” 2016/17-də ilk mərhələdə yarışı tərk edibsə, ötən mövsüm 1/4-ə yüksəlib və burda “Qəbələ” ilə bacarmayıb. Yəni yarımfinala adlayacağı təqdirdə, hər iki komanda ilkə imza atmış olacaq. Ümumilikdə 10 kubok matçında qüvvəsini sınayan "Zirə” indiyədək heç-heçə etməyib. Hesabında 5 qələbə və eyni sayda məğlubiyyət olan komanda 11 qol vurub, 15-ni buraxıb. “Səbail” isə 1 qələbə, 3 yenilgi ilə yadda qalıb. "Zirə” kubokda ilk dəfə "Səbail”lə görüşəcək. Bu komanda "qartallar”ın yarışdakı 7-ci rəqibi olacaq. Əvvəlki 10 matçda zirəlilər 6 klubla üz-üzə gəlib.
Günün ikinci oyunu “Bakcell Arena”da olacaq. “Neftçi” premyer-liqanın son turunda “qolunu bükə bilmədiyi” “Sumqayıt”ı qonaq edəcək. Ümumiyyətlə, tərəflər 10 gün ərzində 3 dəfə görüşmüş olacaqlar. Ancaq bu dəfə Ayxan Abbasovun yetirmələrinin işi çətin olacaq. Çünki flaqman meydana itkisiz çıxacaq. Premyer-liqanın 14-cü turunda isə komandanın əsas vuran ayağı – Baqali Dabo, eləcə də təcrübəli cinah müdafiəçisi Tural Axundov cəza səbəbindən oynaya bilməmişdi. Belə desək, “Neftçi” “Sumqayıt”ı yolunun üstündən təmizləməklə, finala yolu açmış olacaq. Çünki yarımfinaldakı rəqib ya “Səbail”, ya da “Zirə” olacaq. Bu komandalar da aşağı-yuxarı elə “Sumqayıt” səviyyəsində rəqiblərdi. Heç şübhəsiz, kubok yarışını erkən tərk etmək “ağ-qaralar”ın planlarına daxil deyil və görüşün favoriti də bakılılardı. Ancaq “ikinci cəbhə”də uğura daha çox ehtiyac duyan “Sumqayıt” sürpriz edə bilər.
Bazar günü əvvəlcə “Qəbələ” və “Sabah” münasibətlərinə aydınlıq gətirəcək. Yarışa 1/4-dən başlayan bölgə təmsilçisi debütantı qonaq edəcək. Bu, tərəflərin üçüncü dueli olacaq və yolları yalnız premyer-liqada kəsişib. Yəni “Sabah” divizionda çıxış edəndə də “Qəbələ”yə rəqib olmayıb. Komandaların çempionatdakı duellərində meydan sahibi olan tərəf minimal fərqlə qalib gəlib. Yeri gəlmişkən, ölkə kubokunda özünün 14-cü mövsümünə start verəcək “Qəbələ” indiyə qədər 59 oyun keçirib. Başqa sözlə, “Sabah”la sabahkı oyun yubiley – 60-cı matç olacaq.
Hər iki komanda meydana itki ilə çıxacaq. “Qəbələ” İlqar Qurbanovun xidmətindən yararlana bilməyəcək. Ötən mövsüm finalda “Keşlə” ilə qarşılaşan “qırmızı-qaralar” həlledici görüşün sonlarında azlıqda qalmışdı ki, İlqar aqressiv davranışa görə meydandan qovulmuşdu. İntizam Komitəsi isə onu 2 oyunluq cəzalandırmışdı. Bu da o deməkdi ki, Qurbanov “Sabah”la hər iki oyunu buraxmalı olacaq. “Qəbələ” mərhələ adlasa, o, yarımfinalda komandasına kömək edə biləcək. “Sabah”da isə Erik Ramosun cəzası davam edir. Belə ki, “Neftçi”də çıxış edərkən, 2016-cı il mayın 25-də Tofiq Bəhramov adına Respublika stadionunda “Qarabağ”la final qarşılaşmasında, konkret əlavə vaxtın sonuncu - 120-ci dəqiqəsində Fariz Yusifov tərəfindən meydandan qovulan yarımmüdafiəçi 2 oyunluq cəzalanmışdı. O, “Ağsu” ilə 1/8 final mərhələsindəki görüşdə də “Sabah”a kömək edə bilməmişdi. Ramosun cəzası məhz ilk oyundan sonra başa çatacaq və o, 5 gün sonra Masazırda meydana çıxa biləcək.
Nəhayət, mərhələnin daha bir cütü “Tofiq Bəhramov”da üz-üzə gələcək. Hansı ki, dekabrın 3-də eyni məkanda və eyni saatda qarşılaşmışdılar. “Qarabağ” “Keşlə” ilə oyunun aşkar favoritidi. Tərəflərin 13-cü turdakı görüşündə qeydə alınan darmadağın da belə deməyə əsas verir. Hərçənd ağdamlılar dünən İngiltərədən dönüb, istər-istəməz “Arsenal”la oyun və yol yorğunluğu özünü göstərəcək.
Onu da qeyd edək ki, komandaların kubokda yolları indiyədək 4 dəfə kəsişib. Bunların ikisində paytaxt təmsilçisi, ikisində isə ağdamlılar dueldən qalib ayrılıb. Bu duellər çərçivəsində 7 matç baş tutub. Son 3 oyunda “Qarabağ” qol buraxmadan qələbə qazanıb.
“Qarabağ” – “Keşlə” – 7 oyun:+4=1-2, 9-5.
2004/05 1/8 final Qarabağ - İnter 1:0, 0:2
2007/08 1/4 final Qarabağ - İnter 2:2, 0:1
2008/09 final İnter - Qarabağ 0:1
2015/16 yarımfinal İnter - Qarabağ 0:4, 0:1
Qeyd edək ki, bütün oyunlar “CBC Sport” telekanalı vasitəsi ilə canlı yayınlanacaq.
Ölkə kuboku
1/4 final
15 dekabr
7. Neftçi – Sumqayıt
Hakimlər: ƏLİYAR AĞAYEV, Rza Məmmədov, Akif Əmirəli, Səbuhi Bayramov.
Hakim-inspektor: Asim Xudiyev.
AFFA nümayəndəsi: Seymur Səlimli.
Cəzalı: yoxdu.
Bakı. Bakcell Arena. Saat 19.00

8. Zirə – Səbail
Hakimlər: Alik Yunusov, Mübariz Haşımov, Rahil Ramazanov, Kamal Umudlu
Hakim-inspektor: Fizuli Nəcəfov
AFFA nümayəndəsi: Əsgər Əmirəliyev
Cəzalı: yoxdu.
Mərdəkan. Dalğa Arena. Saat 17.00

16 dekabr
5. Qəbələ – Sabah
Hakimlər: RƏVAN HƏMZƏZADƏ, Yaşar Abbasov, Cəmil Quliyev, İnqilab Məmmədov.
Hakim-inspektor: Fazil Mürşüdov.
AFFA nümayəndəsi: Eldar Qasımov.
Cəzalılar: İlqar Qurbanov (Qəbələ), Erik Ramos (Sabah).
Qəbələ. Şəhər stadionu. Saat 14.00

6. Qarabağ – Keşlə
Hakimlər: VÜQAR HƏSƏNLİ, Namiq Hüseynov, Elşad Abdullayev, Rəşad Əhmədov.
Hakim-inspektor: Murad Məmmədov.
AFFA nümayəndəsi: Eldəniz Musayev.
Cəzalı: yoxdu.
Bakı. Tofiq Bəhramov adına Respublika stadionu. Saat 19.00