Hollandiyanın ikinci liqasında 17-ci turun oyunları keçirilib. Gənclərdən ibarət yığmamızın üzvü Ziya Əzizovun formasını geydiyi “Neymegen” səfərdə “Den Boş”a 2:3 hesabıyla uduzub. Ziyanın adı qarşılaşmanın iştirak ərizəsinə salınmayıb. “Neymegen” 25 xalla 10-cu pillədə qərarlaşıb.
Almaniyanın 3-cü liqasında 18-ci turun oyunları baş tutub. Rüfət Dadaşovun “Proyssen”i səfərdə “Karlsrue” ilə qarşılaşıb. Münster klubu bu oyunda darmadağın olub - 0:5. Hələ də zədədən əziyyət çəkən Rüfət qarşılaşmanın iştirakçısı olmayıb. Onun komandası 29 xalla altıncıdı.
İkinci bundesliqada isə 16-cı turun oyunları keçirilib. Dmitri Nazarovun şərəfini qoruduğu “Ertsgebirge” səfərdə “Qroyter”ə divan tutub - 5:0. Nazarov meydanda yaşananları sonadək ehtiyat oyunçular skamyasından izləyib. “Ersgebirge” 18 xalla 12-ci pillədə qərarlaşıb.
Gənclər arasında bundesliqanın cənub zonasında 14-cü turun oyunları baş tutub. Murad Mahmudovun şərəfini qoruduğu “Frankfurt” səfərdə Frankfurtun digər təmsilçisi “Ayntraxt”ın ikinci komandası ilə qarşılaşıb. Rəqibin qələbə qazandığı (3:1) oyuna Murad 77-ci dəqiqədə qoşulub. “Frankfurt” 3 xalla sonuncudu.
Regional liqanın qərb zonasında isə 20-ci turun oyunları keçirilib. Tuğrul Eratın formasını geydiyi “Ştralen” doğma meydanda Düsseldorf “Fortuna”sının ikinci komandasına qalib gəlib - 2:0. Erat görüşün iştirakçısı olmayıb. “Ştralen” 29 xalla 8-ci yerdədi.
Portuqaliya sequndasında 12-ci turun oyunları keçirilib. Renat Dadaşovlu "Eştoril” doğma azarkeşləri önündə Kovilyan “Sportinq”i ilə qarşılaşıb. Futbolçumuzun komandası meydandan qələbə ilə ayrılıb - 1:0. Dadaşov start heyətində meydana çıxıb və 80-ci dəqiqədə əvəzlənib. “Eştoril” 23 xalla 3-cü pillədə qərarlaşıb.
Rusiya premyer-liqasında 17-ci turun oyunları keçirilir. Ramil Şeydayevin formasını geydiyi “Krılya Sovetov” Samarada Ayaz Quliyevin heyətində yer aldığı “Rostov”u sınağa çəkib və 1:0 hesablı qələbəyə sevinib. Şeydayev 80-ci dəqiqədə meydana çıxıb, bundan 2 dəqiqə sonra isə dava-dalaşda iştiraka görə “sarı” ilə cəzalanıb. Ayaz ötən tur qırmızı vərəqə aldığına görə bu oyunda iştirak etməyib. “Krılya Sovetov” 17 xalla 13-cü, “Rostov” isə 24 xalla altıncıdı.