“Sabah” 26 futbolçunun adını açıqladı – Du Keyros isə yoxdu

“Sabah” bu gün Çempionlar Liqasının əsas mərhələsi üçün iştirak ərizəsini UEFA-ya təqdim edib. Valdas Dambrauskas siyahıya 26 futbolçunun adını salıb. Onlardan 23-ü A, 3-ü isə B siyahısına daxil edilib.
Qapıçılar - Amin Ramazanov, Rauf Əyyubov, Stas Pokatilov, Rəvan Mirzəmmədov; müdafiəçilər - Stiv Solvet, Eyden Makkarti, Rəhman Daşdəmirov, Tellur Mütəllimov, Timoteuş Puxaç, Erivaldo Almeyda, Akim Zedadka; yarımmüdafiəçilər - Velko Simiç, Yunes Laşaab, Abdulla Xaybullayev, Umarali Raxmonaliyev, Aleksey İsayev, Kahim Parris, İvan Lepinitsa, Rauf Rüstəmli, Rodriqo Fernandes, Cəfər Muxtarov, Şahin İbrahimov; hücumçular: Kristian Nvaçukvu, Coy-Lens Mikels, Ksander Severina, Patrik Orfe Mbina.
Maraqlıdı ki, siyahıya transferi elə bu gün açıqlanan braziliyalı Du Keyros salınmayıb. 26 yaşlı futbolçu Rusiyanın “Zenit” klubundan cari mövsümün sonunadək icarəyə götürülüb. “Sabah”ın icarə müddəti başa çatandan sonra futbolçunu birdəfəlik transfer etmək hüququ da var. 2023-cü ildən “Zenit”in futbolçusu olan yarımmüdafiəçi son mövsümü icarə əsasında “Orenburq”da keçirib. Braziliyalı futbolçu ötən mövsüm “Orenburq”un heyətində bütün turnirlərdə 29 oyuna çıxıb, 2 qol vurub və 4 məhsuldar ötürmə verib.