İcraçı direktor müqavilənin detallarını və planları açıqladı
Daha bir bank Azərbaycan futboluna sərmayə qoyacaq. Söhbət ötən həftə “Sabah”la sponsorluq müqaviləsi imzalayan “Bank Respublika”dan gedir. Müqavilənin şərtlərinə əsasən “tələbələr”in elitada çıxış edən əsas komandası və eləcə də birinci divizionda mübarizə aparan əvəzediciləri 2018/19 mövsümündə meydana üzərində “Bank Respublika” yazılan formalarla çıxacaq. “Sabah”ın ev oyunlarını keçirdiyi “Əlincə Arena”da isə bankın reklam materialları yerləşdiriləcək. Yeri gəlmişkən, onu da xatırladaq ki, “tələbələr” bankla işbirliyinə gedən heç də ilk elita klubu deyil. 2014-cü ildə “Sumqayıt”la “Kapital Bank” arasında imzalanan müqaviləyə əsasən “kimyaçılar”ın ev oyunlarını keçirdiyi stadion “Kapital Bank Arena” adlanır. Bundan başqa, “tələbələr”də olduğu kimi, “ağ-göylər”in də əsas və ikinci komandasının formalarında banka məxsus əmtəə nişanları yerləşdirilib.
Respublika ərazisində 33 filial və şöbəsi olan bankın premyer-liqanın debütantına sponsorluq etmək fikrinə düşməsi futbol camiəsi arasında heç də birmənalı qarşılanmadı. Bir çoxları bunu klubun qeyr-rəsmi rəhbəri, vergilər naziri Mikayıl Cabbarov amili ilə əlaqələndirir. Onların fikrincə, Cabbarov bu gün hazırki postunu tutmasaydı, “Bank Respublika” “tələbələr”in sponsoru olmayacaqdı. Necə ki, indiyədək bank idman sahəsinə investisiya yatırmayıb. Yeri gəlmişkən, onu da qeyd edək ki, mətbuatda “Bank Respublika”nın Elman Rüstəmova məxsus olduğu bildirilir. Xatıraladaq ki, Rüstəmov həm də Mərkəzi Bankın idarə heyətinin sədridi.
Söylənilənlərə aydınlıq gətirmək üçün “Sabah”ın icraçı direktoru Emin Abbasovun fikirlərini öyrəndik: “Kimin nə söyləməsi bizim üçün maraqlı deyil. Əsas odu ki, iş görürük və bunun da nəticəsi göz qabağındadı.”Bank Respublika”dan əvvəl də ölkədə fəaliyyət göstərən banklar futbola yatırım ediblər və edirlər. Xatırlayırsızsa, bir ara “Unibank” premyer-liqaya sponsorluq edirdi. Bu gün “Kapital Bank” “Sumqayıt”la işbirliyi qurub. Yəni bizim “Bank Respublika” ilə sponsorluq müqaviləsi imzalamağımıza başqa don geydirmək lazım deyil. Niyə məhz bizi seçdilər? Bu suala cavab verməmişdən öncə bildirim ki, məndə olan məlumata görə, yeni sponsorumuz bir çox klublarla maraqlanıb və sonda seçim zamanı bizə üstünlük verib. Onların marketinq şöbəsi premyer-liqanı təhlil edib. Cari mövsümdə ən çox azarkeş bizim Masazırda “Qarabağ”la keçirdiyimiz matçda olub. Gəlin razılaşaq ki, hər stadiona 4500 tamaşaçı gəlmir. Görünür, bu məqam onların diqqətini cəlb edib. Təşəbbüs bankdan gəldi. Ondan sonra həm bankın, həm də bizim marketinq şöbəsinin əməkdaşları arasında bir neçə görüş oldu. Hazırladığımız hesabatda görəcəyimiz işlər, qarşıya qoyulan məqsədlər barədə ətraflı məlumat vermişdik. Araşdırmalardan sonra belə qənaətə gəldilər ki, “Sabah” gələcəyi olan klubdu. İdarəetmədə savadlı, işini bilən insanlar yer alıb. Klubun prezidenti Maqsud Adıgözəlov da bank sektoru üçün yad sima deyil. O uzun illər bu sahədə çalışıb və yetərincə nüfuza malikdi”.
İcraçı direktor yeni yaranan işbirliyinin həm bankın, həm də klubun xeyrinə olacağını düşünür: “Ola bilsin, bu gün “Sabah” ad olaraq hələ gur səslənmir. Ancaq növbəti il və gələcək üçün daha da güclənmək, avrokuboklarda çıxış etmək istəyirik ki, bu üzdən də artıq indidən işlər görülür. Bu gün Masazırla yanaşı, Xırdalan, Saray və Novxanıda da təbliğat işləri aparır, azarkeşləri stadiona dəvət etmək üçün müəyyən işlər görürük. Gələn tamaşaçı da istər-istəməz klubun formasının üzərində, meydanın ətrafında “Bank Respublika”nın adını görüb maraqlanacaq. Mən şəxsən “Unibank”ı premyer-liqanın sponsoru olduqdan sonra yaxından tanımışam. Yəni “Əlincə Arena”ya gələnlər arasında sponsorumuz olan bankın potensial müştəriləri də olacaq. Bundan başqa, bankla birgə müxtəlif sosial layihələr həyata keçirəcəyik. Vaxt ötdükcə istər media, istərsə də futbol ictimaiyyəti bütün bunları görəcək”.
Emin bəyin fikrincə, ölkə futbolunun gələcəyi belə əməkdaşlıqlardan, müxtəlif şirkətlərlə sponsorluq müqavilələrindən asılıdı: “Bir ara futbolumuzda “oliqarx dönəmi” idi. Əksər klublar bir nəfərin əlinə baxırdı ki, bunun da effektli olmadığını zaman göstərdi. İndi başqa vaxtdı. Müxtəlif böyük şirkətləri, bankları futbola cəlb etməklə yola davam etmək ən düzgün variantdı. Mən hələ də başa düşmürəm ki, niyə bizim insanlar hər işə bir qulp qoymağı xoşlayırlar? Bu gün biz “Bank Respublika” ilə sponsorluq müqaviləsi bağlamaqla başqa klublara da bir şans yaradırıq. Məsələn, ölkədə fəaliyyət göstərən digər banklar görəndə ki, Azərbaycanın üzdə olan bankı hansısa kluba sponsorluq edir, onların da bu sahəyə marağı artacaq. Bizim əməkdaşlığımız “yolaverdi layihə” olsaydı, müddəti bir il yox, daha çox olardı. Sponsorun nəyə və yaxud kimə görəsə kluba pul vermək niyyəti var idisə, birdəfəlik 2-3 illik müqavilə imzalayıb, bəribaşdan pulu kluba ödəyib kənara çəkilərdi. Ancaq göründüyü kimi, hər iki tərəf ciddi iş görmək üçün bu yola çıxıb. Bir ildən sonra dəyirmi masa ətrafına yığışıb geridə qalan müddətdə görülən işlərlə bağlı təhlillər aparacaq, müqavilənin xeyirli və ya ziyanlı olduğunu müzakirə edəcəyik. Hər şey normal olarsa, əməkdaşlığın müddəti uzadılacaq”.
RƏŞAD
