“Həm yığmanın dəstəyə böyük ehtiyacı var, həm də özümüz komandanın yanında olmaq istəyirik”
Yığmanı Millətlər Liqasının qrup mərhələsi çərçivəsində finala bərabər oyun gözləyir. Qurban Qurbanovun yetirmələri sabah Kosovo ilə münasibətlərinə aydınlıq gətirəcək. Hər iki komanda 5-ci turda “quru” qələbəyə sevindi. Milli evdə Farar adalarını 2, Kosovo isə səfərdə Maltanı 5 cavabsız qolla məğlub etdi. Bir sözlə, Priştinada “qan su yerinə axacaq”. Rəqibin meydan sahibi olması millinin əleyhinə olan ən böyük amillərdən biridi. Şübhəsiz, yerli azarkeşlər 13500 azarkeş tutumuna malik “Fadil Vokri” stadionunu dolduracaq və qonaqları təzyiq altında saxlayacaq. Bəs görəsən, Qurbanovun yetirmələrini dəstəkləyən tapılacaq?
Bu baxımdan ilk ağla gələn “Milli dəstə”di. Görəsən, yığmanın səfər oyunları zamanı komandanı tək qoymayan fanklub üzvləri Kosovoya səfər haqda düşünürmü? “Milli dəstə”nin rəhbəri Şamil Mustafayevin fikirlərini öyrəndik: “Kosovo ilə matça getmək planımız var. Sadəcə, müəyyən məsələlər var ki, onların üzərində oturub ciddi düşünməliyik və daha sonra qərar verməliyik. Sabah (bu gün) həm öz aramızda, həm də başqa şəxslərlə bu məsələləri müzakirə edib qərar verəcəyik. Kosovo ilə matç milli üçün çox önəmli oyundu. Həm yığmanın dəstəyə böyük ehtiyacı var, həm də özümüz komandanın yanında olmaq istəyirik. Çünki yığmanın heç bir səfər matçını qaçırmırıq. Sadəcə, qeyri-müəyyənlik içində olduğumuzdan iştirakımız hələ ki sual altındadı”.
FARİZ