Ağdamlılar sabah axşam uçur
“Sumqayıt” üzərində qələbə qazanan və 5 oyunluq məğlubiyyətsiz oyunlar seriyasına son qoyan “Qarabağ” Ukrayna səfərinə hazırlaşır. Cümə axşamı Avroliqanın qrup mərhələsinin 4-cü turu çərçivəsində Poltavada “Vorskla”nın qonağı olacaq təmsilçimiz sabah vətəni tərk edəcək. Ağdamlıları səfərə daşıyacaq çarter reysli təyyarə axşam saatlarında, dəqiq desək, 18.30-da havaya qalxacaq və maraqlıdı ki, Poltavada yerə enəcək. Halbuki “Qarabağ”ın Xarkova uçub, ordan oyunun keçiriləcəyi şəhərə avtobusla yollanacağı gözlənilirdi. Poltavadakı hava limanı yeni tikildiyindən və iritutumlu təyyarələri qəbul etmək baxımından çətinlik çəkdiyindən, Xarkov variantı daha real idi. Lakin tərəflər arasındakı danışıqlar müsbət tamamlanıb. Belədə qarşı tərəf AZAL-a məxsus “hava gəmisini” qəbul edə biləcəyini bildirib.
Dörd saata yaxın havada olacaq “köhlən atlar” və nümayəndə heyətində yer alan jurnalistlər Ukrayna vaxtı ilə təxminən 20.30-da Poltavaya çatacaq. Ordan birbaşa otelə yollanacaq futbolçulara istirahət veriləcək. Ertəsi, yəni çərşənbə günü Bakı vaxtı ilə saat 20.30-da Qurban Qurbanovun mətbuat konfransı təşkil olunacaq. Bundan yarım saat sonra isə “Qarabağ”ın oyunöncəsi son məşqçi baş tutacaq.
Avropanın mərkəzindəki səfər oyunları ilə müqayisədə ağdamlılar bu dəfə dəstəksiz qalmayacaq. Sosial şəbəkələrdə aparılan müzakirələrə əsasən deyə bilərik ki, Poltavada və başqa şəhərlərdə yaşayan xeyli sayda azərbaycanlı matç saatında stadiondakı yerini tutacaq. Klubun mətbuat katibi Nurlan İbrahimovla söhbətdə buna bir daha əmin olduq: “Bildiyiniz kimi, Ukraynada xeyli sayda azərbaycanlı yaşayır. Rəsmi və qeyri-rəsmi olaraq soruşur, maraqlanırlar, müraciət edirlər. Əminliklə deyə bilərəm ki, oyuna böyük maraq var. Dəqiq say deyə bilmərəm. Təxmini hesablamalarımıza görə, stadionda 300-ə yaxın həmyerlimiz “Qarabağ”ı dəstəkləyəcək”.
HƏBİB