Topaz premyer-liqasının 10-cu turunda sensasiya qeydə alınmadı. Favoritlər qələbə qazandı, yalnız bir görüşdə qalib müəyyənləşmədi.
Tura "ASK Arena"dakı görüşlə start verildi. Maraqlıdı ki, həm "Keşlə", həm də "Neftçi" əvvəlki oyununu "Qarabağ"a qarşı keçirmişdi. "Ağ-qaralar" ötən tur çərçivəsində "köhlən atlar"ı sınağa çəkmişdisə, "qırmızı-ağlar" çərşənbə günü 7-ci turdan təxirə salınan görüşdə ağdamlılarla qarşılaşdı. Bu komandalardan heç biri son 5 ilin çempionuna məğlub olmadığına görə öz aralarındakı duelə yüksək əhval-ruhiyyədə hazırlaşmışdılar. Qazonu yaxşı vəziyyətdə olmayan stadionda "Neftçi"nin işi çətin görünürdüsə, həftəiçi oyuna çıxmağı "Keşlə"nin əleyhinə idi. Matçın əvvəlində vurulan qol "ağ-qaralar"a 3 xalı qazandırdı. Bununla da turnir cədvəlinin lideri digər qarşılaşmanın nəticəsindən asılı olmayaraq, ən yaxın izləyicisi ilə aradakı xal fərqini qorumuş oldu. Tərlan Əhmədovun sabiq komandası ilə dueldə qalib gəlmək arzusu baş tutmadı. Lakin qısa müddətdə "Keşlə"nin oyununda irəliləyişin olduğunu da qeyd etməliyik. Matçın taleyini həll edən qola imza atan Mirabdulla Abbasov isə yığma perspektivini bir qədər də artırdı.
"Neftçi"nin qələbəsini rəsmiləşdirən final fitindən bir neçə dəqiqə sonra "Qarabağ" meydana çıxdı. Məhz bu üzdən Qurban Qurbanovun komandasını qələbədən başqa heç nə qane etmirdi. "Köhlən atlar" "Sumqayıt"la görüşdə 3 xalı hesabına yazdırmaqla aradakı məsafənin böyüməsinə imkan vermədi. "Tofiq Bəhramov"un növbəti dəfə Ağdam klubuna düşərli olduğu təsdiqləndi. Elə Qurbanov özü də yetirmələrinin bu məkanda özlərini rahat hiss etdiklərini vurğulayıb. Uğursuz zolağa düşən komanda üçün bu qələbə çox vacib idi. Cümə axşamı Avroliqada “Vorskla” ilə qarşılaşacaq ağdamlılar Ukraynaya yüksək motivasiya ilə yollanacaq. "Sumqayıt"ın enişi isə davam edir. Mövsümün əvvəlindəki çıxışı ilə hər kəsi təəccübləndirən "kimyaçılar", deyəsən, bunun davamını gətirə bilmədi.
Dünənki matçlara gəlincə, "Qəbələ" növbəti 3 xalı hesabına yazdırdı. Başqa sözlə, Sənan Qurbanovun yetirmələri iddialılar arasına dönmək hədəfinə doğru inamla addımlayır. İki dövrə arasındakı fasiləyə 7-ci pillədə, özü də 5 xalla yollanan “qırmızı-qaralar” son 3 matçda məğlubiyyət nədi bilmir. Bunun nəticəsində bölgə təmsilçisi hazırda 12 xalla 5-ci yerə yüksəlib. Sanki komanda artıq pis günlərini geridə qoyub. Təbii, bu durumda Ceyms Adeniyi – Stiven Jozef-Monroz cütlüyünün də payı böyükdü. “Sabah” isə ardıcıl 2 qələbədən sonra uduzdu.
Turun son oyununda qol səsi çıxmadı. Hər nə qədər “Zirə” üstün oyun sərgiləsə də, bu, nəticədə əksini tapmayanda bir işə yaramır. Fakt budu ki, hal-hazırda Samir Abasovun komandası turnir cədvəlinin sonuncusudu. Çalışdırıcının “sehrli çubuğu”nun nə zaman işə düşəcəyi, ümumiyyətlə, bunun baş verib-verməyəcəyi maraq doğurur. Mövsümə bərbad start verən “Səbail” isə hazırda “3-lük”dədi. Aftandil Hacıyevin yetirmələri ardıcıl 4-cü oyunda məğlub olmadı. Düzdü, bunlardan biri texniki qələbədi. Lakin o da “dənizçilər”in günahı deyil. Maraqlıdı ki, “Səbail” ötən turda olduğu kimi, yenə də azlıqda qaldı. “Keşlə” ilə görüşdə təxminən 50 dəqiqə 10 nəfərlə mübarizə aparan Hacıyevin komandası bu dəfə yarım saat belə vəziyyətdə oldu.
Topaz premyer-liqası
2-ci dövrə
10-cu tur
3 noyabr
Keşlə - Neftçi 0:1
Qarabağ – Sumqayıt 2:0
4 noyabr
Qəbələ - Sabah 2:1
Zirə - Səbail 0:0
1. Neftçi 10 8 1 1 20-7 25
2. Qarabağ 10 6 2 2 17-11 20
3. Səbail 10 5 2 3 12-11 17
4. Sabah 10 5 1 4 9-11 16
5. Qəbələ 10 3 3 4 14-14 12
6. Sumqayıt 10 3 2 5 10-13 11
7. Keşlə 10 1 3 6 8-14 6
8. Zirə 10 1 2 7 7-16 5
Bombardirlər: Marko Deviç (Sabah), Baqali Dabo (Neftçi) – 5.
Qeyd: İntizam Komitəsinin qərarına əsasən 4-cü turda "Zirə"yə, 8-ci turda isə "Qarabağ"a texniki məğlubiyyət verilib.
Növbəti turun oyunları: 10 noyabr - Neftçi – Zirə, Sabah – Səbail; 11 noyabr - Qəbələ - Qarabağ, Sumqayıt – Keşlə.