Hacı-Məhərrəmov: “Yığmanın qrupda keçirəcəyi oyunları da gözləməyi məsləhət bildik”
Xeyli vaxtdı ki, Klublar Komitəsindən (KK) bir xəbər yoxdu. Halbuki ölkə futbolunda bir sıra önəmli olaylar yaşanıb. Ancaq nədənsə klub nümayəndələri bir araya gəlməyi lazım bilmir.
KK-nın növbəti iclasının vaxtını öyrənmək üçün komitənin mətbuat katibi Zaur Hacı-Məhərrəmovla əlaqə saxladıq. O, qarşıdakı toplantının yığmanın Millətlər Liqasının qrup mərhələsi çərçivəsində Farer adaları və Kosovo ilə keçirəcəyi oyunlarından sonra gerçəkləşəcəyini bildirdi. Daha dəqiqi, iclasın noyabrın son ongünlüyündə təşkili planlaşdırılır.
Halbuki bir müddət öncə klub nümayəndələrinin oktyabrın sonlarında bir araya gələcəyi deyilmişdi. Dəyişikliklə bağlı Hacı-Məhərrəmov bunları dedi: “Bəli, ilkin planda belə bir fikir var idi. Ancaq dəqiq deyildi. Hər şey gündəmdə olan məsələlərdən asılıdı. Belə deyək, iclas xatirinə bir araya gəlmək mənasızdı. Problemlər, suallar, hansısa klubların qabardacağı məqamlar olmalıdı. Ortada konkret nəsə yoxdusa, təklif gəlmirsə, yaxud da lazımi qədər məsələlər yığılmırsa, bir araya gəlməyin mənası yoxdu. Bəzi məqamlar var, bir neçəsi də gözlənilir. Ona görə də noyabrın sonunda toplaşmaq qərarına gəldik. İlin yekunlarını da müzakirə edəcəyik. Buna görə yığmanın qrupda keçirəcəyi oyunları da gözləməyi məsləhət bildik”.
FARİZ