Ağdamlılar bu gün tam tərkibdə yığışır
Yığmaların oyunları ilə bağlı yaranan fasilə dönəmində “Qarabağ” 8-ci turda qarşılaşacağı “Səbail”lə görüşə ciddi itkilərlə hazırlaşdı. İtki deyəndə, təbii ki, millilərin heyətinə qatılan futbolçuları nəzərdə tuturuq. Yeddi nəfər əsas yığmaya cəlb olunmuşdusa, Rəşad Sadıqovla birgə üç nəfər U-21-in sıralarında idi. Daha üç nəfər – Simeon Slavçev, Con Delarj və Hannes Tur Halldorsson isə öz ölkələrinin yığmalarının şərəfini qorumaq üçün Azərbaycanı tərk etmişdi. Əsas millinin üzvlərinə dünənə qədər istirahət imkanı yaradılmışdı. “Köhlən atlar” bu gündən etibarən tam tərkibdə bir araya gələcək. Belə ki, əsas yığmanın və U-21-in üzvləriylə yanaşı, yuxarıda adı çəkilən üç legioner də bugünkü məşqdə Qurban Qurbanovun sərəncamında olacaq.
Son vaxtlar zədədən əziyyət çəkən Dani Kintananın artıq bir neçə müddətdi kollektiv çalışmalarda iştirak etdiyini bilirsiz. Sentyabrın 26-da, “Zirə” ilə oyunda çiyni çıxan Vild-Donald Geryenin durumu da yaxşılığa doğru dəyişməkdədi. Sevindirici xəbər haitili futbolçunun da komanda ilə birgə hazırlıq keçməsidi. Zədə səbəbindən “Sportinq” və “Arsenal”la matçları buraxan Rəşad Sadıqovun da durumu yaxşılaşıb. Bu isə o deməkdi ki, Qurban Qurbanov “Səbail”lə oyunda bu üç futbolçuya bir neçə dəqiqə də olsa, oynamaq imkanı yarada bilər.
“Qarabağ”ın əcnəbilərinin son bir həftədə yığmalarda nə ilə yadda qaldığına da nəzər salaq. C liqasının 3-cü qrupunda yer alan Bolqarıstan yığmasının ilk rəqibi oktyabrın 13-də Cənubi Kipr olub. Sofiyada keçirilən qarşılaşmada bolqarlar 2:1 hesabıyla qələbə qazanıb ki, Simeon Slavçev 90 dəqiqə meydanda olub. Oktyabrın 16-da Norveçlə səfər görüşündə “6 nömrə” yenə start heyətində yer alıb. Lakin bu dəfə cəmi 58 dəqiqə oynamaq imkanı qazanıb. A liqasının 2-ci qrupunda qərarlaşan İslandiya millisi oktyabrın 12-də dünya çempionu Fransanın qonağı olub. Genqamda, 2:2 hesabı ilə bitən yoxlama oyununda Hannes Tur Halldorsson 46-cı dəqiqədən oyuna qoşulub və 77-ci dəqiqədə sarı vərəqə ilə cəzalandırılıb. Kilian Mbappe hər iki halda məhz “Qarabağ”ın qapıçısı “çərçivə”də olduğu vaxt sevinib. Oktyabrın 15-də isə İslandiya İsveçrəni qonaq edib ki, Halldorsson bu dəfə “11-lik”də şans qazanıb. Yığmasının 1:2 hesabıyla uduzduğu qarşılaşmada ölkəmizdə legioner həyatı yaşayan futbolçu 90 dəqiqə meydanda olub. Yalnız Con Delarj Afrikaya uçmasına peşman olub. Belə ki, Afrika Millətlər Liqasında Konqonun Liberiya ilə oktyabrın 11-i və 16-da keçirdiyi hər iki oyunda Delarj birincilərin heyətində ehtiyatda qalıb.
Oktyabrın 25-də BOS-da keçiriləcək “Qarabağ” – “Vorskla” görüşünün biletləri artıq bir həftədi satışa çıxarılıb. Klubun mətbuat katibi Nurlan İbrahimovla əlaqə saxlayıb, nə qədər biletin satıldığını öyrəndikdə məlum oldu ki, 7000 nəfərə yaxın azarkeş artıq indidən stadiondakı yerini təmin edib.
HƏBİB
