“Hər kəsi yenidən görmək çox gözəl idi”
Berti Foqtsun dönəmində yığmaya dəvət alan Rüfət Dadaşov uzun müddət ölkənin əsas komandasından uzaq düşdü. Hələ bir müddət öncə Qurban Qurbanova hücumçu ilə bağlı sual ünvanlamışdıq. O, Rüfəti nəzarətdə saxladığını demişdi. Təbii, yığmanın hücum xəttində problemlərin olduğu birmənalıdı. Bu üzdən “Proyssen”də qolları sıralayan Rüfətin milliyə yenidən çağırılması zəruri idi. Nəhayət, Qurbanov 4 illik fasilədən sonra Dadaşova dəvət göndərdi. Onun qarşıdakı iki görüşdə - Farer adaları və Malta ilə oyunlarda oynayıb-oynamayacağı baş məşqçinin qərarından asılı olacaq. Forvard Almaniyanın “Bild” nəşrinə müsahibə verib. Rüfət yığmaya dəvətlə bağlı hisslərini bölüşüb, qarşıdakı matçlar haqda danışıb.
- Azərbaycan millisinə dəvət səni təəccübləndirmədi?
- Yenidən vətənim üçün oynamaq mənim xəyalım idi. Düzünü desəm, belə erkən dəvət gələcəyini gözləmirdim. Buna görə klubuma - “Proyssen” və məşqçilər korpusuna minnətdarlığımı bildirirəm.
- Orda əsas heyətə düşmək şansını necə dəyərləndirirsən?
- Əlbəttə, oynayacağıma ümid edirəm. Lakin mövqeyimdə rəqabətin hansı səviyyədə olduğunu bilmirəm. Uzun müddətdi milliyə çağırılmadığıma görə digər oyunçuların çoxundan xəbərim yoxdu.
- “Proyssen”in sabiq futbolçusu Dmitri Nazarov da dəvətlilər arasındadı…
- Dmitri Bakıya mənimlə birlikdə gəldi. Biz yaxın dostuq. Eyni zamanda millinin düşərgəsində eyni otaqda qalırıq.
- Bakıda anadan olmusan və ailən hazırda orda yaşayır. Onlarla görüşmək imkanın oldu?
- Bəli, bura gələndə qohumlarım məni ziyarət etdi, onlarla söhbətləşmək fürsətim oldu. Hər kəsi yenidən görmək çox gözəl idi.
- Oktyabrın 11-də Farer adaları, 14-də isə Malta ilə qarşılaşacaqsız. Azərbaycan yığmasını nə gözləyir?
- Hər iki görüşdə qalib gəlmək şansımız var. Bundan yararlanmaq üçün əlimizdən gələni edəcəyik.
FARİZ hazırladı