Yığmaya dəvət alan Riçard Almeyda Qazaxıstan çempionatının 29-cu turunda meydana çıxmayıb. Yarımmüdafiəçinin bu yay transfer olunduğu “Astana” səfərdə “Aktobe” ilə üz-üzə gəlib. Qonaqlar 2:1 hesablı qələbəyə sevinib. Almeyda matçı ehtiyat oyunçular skamyasından izləyib. "Astana" çempionluğa doğru inamla addımlayır. Paytaxt təmsilçisi hazırda 70 xalla vahid liderdi.
Keçək Portuqaliya sequndasına. Sözügedən birincilikdə 6-cı turun oyunları keçirilib. Renat Dadaşovlu "Eştoril” səfərdə “Akademika Koimbra” ilə qarşılaşıb. Meydan sahibləri 2:7 hesablı darmadağınla üzləşib. Dadaşov 65-ci dəqiqədə meydana çıxıb, 71 və 90-cı dəqiqələrdə fərqlənməyi də bacarıb. “Eştoril” 12 xalla 4-cü yerdədi.
Renatın qardaşı Rüfət həftəsonu forma geyib. Lakin onun komandası qələbə qazanmayıb. Belə ki, “Proyssen” Almaniyanın 3-cü liqasında 11-ci tur çərçivəsində səfərdə “Unterhahinq”lə qarşılaşıb. Münster klubu bu oyundan 1 xalla ayrılıb (1:1). Rüfət də bu görüşün iştirakçısı olub. O, “Proyssen”in start heyətində meydana çıxıb və əvəzlənməyib. Adı çəkilən komanda 19 xalla üçüncüdü.
Latviyanın birinci liqasının 20-ci turunda Vüqar Əsgərovlu “Dauqavpils” səfərdə “Stayçeles Bebri” ilə qarşılaşıb. Qonaqlar 5 cavabsız qolla qalib gəlib. Vüqar start heyətində meydana çıxıb, 68-ci dəqiqədə əvəzlənib. Vurduğu 25 qolla həm komandasının, həm də bütövlükdə çempionatın bombardiri olan Əsgərov bu oyunda fərqlənə bilməyib. “Dauqavpils” 20 turdan sonra 52 xalla 12 kollektiv arasında birinci pillədə qərarlaşıb.
Yığmadan uzaq düşən Eddi İsrafilov da son turda oynayıb. Onun formasını geydiyi “Alkorkon” İspaniya sequndasının 8-ci turunda “Las Palmas”ın qonağı olub. Həmin görüşdə qol səsi çıxmayıb. İsrafilov start heyətində yer alıb və sonadək meydanda olub. Eddi 72-ci dəqiqədə sarı vərəqə ilə də cəzalanıb. Hazırda 15 xala malik “Alkorkon” turnir cədvəlinin dördüncüsüdü.
Daha bir yığma üzvü millinin düşərgəsinə qələbə əhval-ruhiyyəsi ilə gəlib. Söhbət “Aleksandriya”nın müdafiəçisi Pavel Paşayevdən gedir. Ukrayna premyer-liqasında 11-ci turun oyunları gerçəkləşib. “Aleksandriya” doğma meydanda Odessa “Çernomorets”i ilə qarşılaşıb və 3:2 hesablı qələbə qazanıb. Paşayev oyunu əvəzlənmədən keçirib, 41-ci dəqiqədə sarı vərəqə ilə də cəzalanıb. Hazırda “Aleksandriya” turnir cədvəlində 3-cü yerdədi.
Almaniyanın 2-ci bundesliqasında 9-cu tur Dmitri Nazarov üçün uğurlu alınıb. Onun formasını geydiyi “Ertsgebirge” "doğma divarlar" arasında “Holştayn”la münasibətlərinə aydınlıq gətirib. Aue təmsilçisi minimal fərqlə qələbə qazanıb - 2:1. Nazarov 86-cı dəqiqədə meydana çıxıb. Komandasının qələbə qolunu da Dmitri vurub. O, 90-cı dəqiqədə matçın yekun nəticəsini müəyyənləşdirib. “Ertsgebirge” hazırda 10 xalla 13-cüdü.
Rusiya premyer-liqasında 10-cu turun oyunları keçirilib. Ramil Şeydayevin formasını geyindiyi “Krılya Sovetov” doğma meydanda Moskva “Dinamo”su ilə üz-üzə gəlib. Meydab sahibləri minimal hesabla qalib gəlib - 1:0. Ramil görüşün iştirakçısı olmayıb. Yığma üzvü qarşılaşmanı ehtiyat oyunçular skamyasından izləyib. “Krılya Sovetov” 10 turdan sonra 10 xal toplayıb və 16 iştirakçı arasında 12-ci yerdədi.
Hollandiyanın ikinci liqasında növbəti matçlar reallaşıb. Ziya Əzizovun şərəfini qoruduğu “Neymegen” 8-ci turda səfərdə “Almere Siti” ilə qarşılaşıb. Qonaqlar 0:1 hesabı ilə məğlub olub. Ziyanın adı matçın iştirak ərizəsinə salınmayıb. “Neymegen”in hazırda 15 xalla 5-ci pillədə qərarlaşdığını da qeyd edək.
Uzun müddətdi yığmadan uzaq düşən Dəniz Yılmaz da şans qazanmayanlardandı. Belə ki, Türkiyənin 1-ci liqasının 8-ci turunda “Gənclərbirliyi” səfərdə “Altay”ın qonağı olub. Qonaqlar meydandan 3 xalla ayılıb (1:0). Zədəli olduğuna görə Dənizin adı “Gənclərbirliyi”nin iştirak ərizəsinə daxil edilməyib. Maksimum nəticə göstərən bu komanda turnir cədvəlinin lideridi.
FARİZ