Ağatahir Əzimov: “Futzalçı yetişdirmək mümkündü, yetər ki, məktəb olsun”
Ağarza Rzayev: “Anlaşma problemi var, ehtiyat qüvvə kasaddı”
“Araz” ötən həftəyə “damğa vurdu”. Millinin də baş məşqçisi olan Joze Alesio da Silvanın komandası Çempionlar Liqasında faciə yaşadı. Naxçıvan təmsilçisi əsas mərhələ çərçivəsində Slovakiyada keçirdiyi üç oyunun heç birində qələbə qazana bilmədi və mübarizəni dayandıraraq, Bakıya “əli ətəyindən uzun döndü”. Azərbaycan futzalının siması sayılan, millinin bazası hesab olunan komandanın sırf yerlilərlə qatıldığı ilk turnirdə fiaskoyla üzləşməsi birmənalı qarşılanmadı.
Ölkə futzalının üzdə olan simalarına müraciət edib “Araz”ın uğursuzluğuna şərh vermələrini istədik.
19 yaşadək futzalçılardan ibarət yığmanın baş məşqçisi Ağatahir Əzimov üçün “Araz”ın fiaskosu sürpriz olmayıb: “Mənim üçün təəccüblü olmadı. Çünki komanda Slovakiyaya yenilənmiş heyətlə gedib. Heyətin tən yarısı isə cavan uşaqlardı, aralarında debütantlar var. Siz də tanıyırsız, bəziləri ötən mövsüm birinci liqada çıxış edib. Belə götürəndə yüksək liqa təcrübələri belə azdı, nəinki “Araz”la ÇL-də oynamaq. Əvvəl komandada braziliyalılar var idi, ilk “4-lük” onlardan formalaşdırılırdı. Böyür-başlarında da 4-5 yerli futzalçı var idi. Məşqçi yerlilərinə dinclik verəndə bizim uşaqları meydana buraxırdı. Bilirdin ki, bu bir neçə dəqiqə ərzində yerlilər hesabı qoruya biləcək. Ancaq indi braziliyalıların əvəzləyiciləri bu gün əsas heyətdə oynayır, 4-5 cavan uşaq ehtiyatda qalır. Alesio gəncləri oyuna buraxmağa ürək eləmir, vaxta işləmək və meydandakılara dinclik vermək, tempi aşağı salmaq üçün komandanı qapıçısız oynadır. Bu isə risklidi. Sözün həqiqi mənasında komandanın gücü çatmadı. Qırmızı vərəqələr və zədələr də həddən artıq yorğun olmaqdan irəli gəlir. Görəndə ki, etmək istədiyi alınmır, dəstək yoxdu, oyunçu əsəbləşir, emosiyalarına hakim ola bilmir və belədə vərəqə alır. Həddən artıq yüklənəndə zədə riski də artır. Bildiyimə görə, Rizvan məhz zədələndiyi üçün son qarşılaşmada oynamayıb, 3 nəfər də cəzalı olub. Onsuz da kasad heyətin 4 əsas üzvünün yoxluğu son oyunda özünü aşkar göstərdi. Təcrübəli kim var: Rizvan, Xətai, İsa, Rövşən, Ramiz, vəssalam. Braziliyalıların vaxtında Samir Həmzəyev ehtiyatda qalırdı, bu gün əsas oyunçu gözüylə baxılır. Bir sözlə, bu qədər problemin fonunda komandadan uğurlu çıxış gözləmək olmazdı. Şans da təmsilçimizdən üz döndərdi. Qrupdakı komandaların hamısında legionerlər oynayır. Həm “Vytis”də, həm də “Luçeneç”də braziliyalılar var. Onların ən zəifinin səviyyəsi isə yerlilərdən üstündü, bunu hər kəs bilir. Malta çempionunda tanıdığım 2-3 gürcü var. Demirəm gürcülər bizdən üstündü, onları udmaq olardı. Ancaq 2 qırmızı vərəqə işləri korladı. Alesioda heç bir günah görmürəm. Onun məşqçilik bacarığına hər kəs bələddi. Komandanın üzərinə çox getməyin də tərəfdarı deyiləm. Onsuz da bu heç nəyi dəyişmir. Qoy bir il boşa verilsin, amma yerlilər oyun təcrübəsi qazansın”.
Təcrübəli futzalçı vəziyyətdən çıxış yolunu da göstərdi: “Araz” legionerlərdən imtina edib, yerliləri oynadır deyə ümid etsək ki, bununla da futzalımız düzələcək, səhv yanaşmadı. “Araz” legioner oynatmır, digər klublar oynadır. Bəyəm “bir güllə bahar” olacaq? Digər tərəfdən, hamı yerli oynatmaq istəsə, xammal çatmayacaq. Futzal məktəblərimiz olmalıdı! Başçılıq etdiyim U-19-dan nümunə çəkim. Mən yığmaya namizəd tapa bilmirəm. Böyük futbolda axtardım, heç kim vermək istəmir. 18-19 yaşlı uşaqlardan kimdə potensial varsa, klubu buraxmır, zəiflər isə əsgərliyə gedir. Reallıq budu. Sağ olsun Zaur müəllim (Futzal Federasiyasının prezidenti Zaur Axundovu nəzərdə tutur), “Keşlə”nin də rəhbəridi deyə 5-6 uşağı o komandadan götürdüm. Ordan-burdan da 2-3 nəfər ayağı top tutan uşaq yığmışam. Əvvəlcə nəticə yox idi, ancaq son vaxtlar istədiyimizi əldə edə bilirik, xallar toplayırıq. Bu onu göstərir ki, bizdə futzalçı yetişdirmək mümkündü, yetər ki, məktəb olsun. Futbolu demirəm. Amma futzal oynamağı bacarırıq”.
Futzal Federasiyasının sabiq prezidenti Ağarza Rzayev də problemə kompleks yanaşmağı təklif edir: “Azərbaycan çempionatı ilə avrokuboklar fərqlidi, orda təzyiq olur, 3-4 gün ərzində üç oyuna çıxırsan. Görünür, komanda turnirə tam hazır ola bilməyib. Açığı, mən yığmanın Qazaxıstanla yoldaşlıq görüşünü izləyəndə bu uşaqların problemlərini gördüm. Anlaşma problemi var idi, ehtiyat qüvvə kasaddı. Buna baxmayaraq, “Araz”ı asıb-kəsməklə heç nə əldə edə bilməyəcəyik. Hələ orda Azərbaycan futzalının qaymaqları çıxış edir. Futbolumuzda olduğu kimi, futzalın da səviyyəsi düşüb, maraq azalıb. Böyük futbolda vaxtilə 20-dən çox klub mübarizə aparırdı. Futbol olmayanda isə futzala axın var idi. Şirkətlər maraq göstərirdi. “Turan AİR”, “Azərneftyanacaq”, “Azfarma”, “Anqloyl”, “Azmetko” və başqa şirkət komandaları var idi. Legionerlər də indiki qədər deyildi. İndi “Araz” braziliyalılardan imtina edir, o birilər iranlıları gətirib doldurub. Nə olsun ki, İranda futzal populyardı, reytinqi var, bizə zəiflər gəlib. Elə bil küçədən tutub gətiriblər. Bu qoca vaxtımda mən onlara “boy verərəm”. Onların Azərbaycan futzalına nə faydası var?
Mən Alesionu günahlandıra bilmərəm. Adamın başının üstündə Allahı var, o, yaxşı mütəxəssisdi. Sadəcə, yayda heyətin yarıdan çoxu dağıldı, komandanın onurğasını təşkil edən oyunçular getdi. Yenidən komandanı ayaqüstə qaldırmaq asan məsələ deyil. İstəsəydilər, iki-üç nəfəri icarəyə götürə bilərdilər. Lap elə güclü oyunçular da gətirməyə gücləri çatardı. Görünür, rəhbərlik perspektivi düşünür ki, öz oyunçularına beynəlxalq təcrübə qazandırsın”.
MİRAĞA