“Açığı, klub rəhbərliyi ilə söhbətimizdə “1 nömrə” olacağımı müzakirə etmişdik”
Mövsümün gedişində “çərçivə”də problemlə üzləşmək istəməyən “Sumqayıt” rəhbərliyi avqustun 17-də Orxan Sadıqlını “Keşlə”dən icarəyə götürməyi lazım bildi. Elə Orxan da bu keçidin əleyhinə deyildi. Paytaxt təmsilçisində Kamran Ağayevin kölgəsində qalmağa razılaşmayan qokiper “kimyaçılar”a “1 nömrə” kimi yollanmağa qərar verdi. Ancaq yayda üz tutduğu komandada hələ də debüt edə bilməyib. Mehti Cənnətovun inamlı oyunu, “gənclik şəhəri” təmsilçisinin premyer-liqada uğurlu çıxışı Orxanı “Keşlə”də olduğu kimi, “ağ-göylər”də də ehtiyat oyunçular skamyasında oturmağa məcbur edib. Bu yerdə ortaya haqlı sual çıxır: Orxan avqustda atdığı addıma görə peşman deyil ki?
Bu suala aydınlıq gətirmək üçün “Xəzər Lənkəran”ın yetirməsi ilə əlaqə saxladıq. Sadıqlı özü də üzləşdiyi duruma gülüşlə reaksiya verdi: “Komanda udur, Mehti də “çərçivə”də inamlı təsir bağışlayır. Belə olan halda hansı məşqçi qapıçı dəyişikliyinə əl atar? Açığı, klub rəhbərliyi ilə söhbətimizdə “1 nömrə” olacağımı müzakirə etmişdik. Ancaq uğurlu seriya davam etdiyindən, hələ ki şansımı gözləyirəm. Onu da bildirim ki, buna görə üzgün deyiləm. Təki komanda daha da yaxşı oynasın, qələbələri sıralasın. Əsas “Sumqayıt”ın mükafatçılar sırasında yer almasıdı. Fikrimcə, mənim də şansım olacaq. Mən də məşqçi olsam, eyni addımı ataram. Mehtiyə bundan sonrakı qarşılaşmalarda da uğurlar arzulayıram”.
Orxan “Keşlə”də Kamran Ağayevin əvəzedicisi idisə, indi “Sumqayıt”da Cənnətovun kölgəsindədi. Ancaq Sadıqlı yayda klubunu dəyişdiyinə görə peşman olmadığını dedi: “Həyatda heç vaxt atdığım addıma görə peşman olmamışam. Çünki bir işi görməmişdən öncə çox ölçüb-biçirəm. Yayda “Sumqayıt”a üz tutduğuma görə də təəssüflənmirəm. Yeni komandamda hər şey məni qane edir. Yenə deyirəm, çempionat uzun marafondu və mənim də özümü göstərmək imkanım olacaq”.
RƏŞAD