Oyun başa çatandan sonra hər iki komandanın baş məşqçinin iştirakı ilə ənənəvi mətbuat konfransı keçirildi. Öncə media nümayəndələrinin qarşısına "Arsenal"ın çalışdırıcısı Unay Emeri çıxdı. İspan mütəxəssis birbaşa suallara cavab vermək istədiyini bildirdi.
- Bu oyunda çox böyük çətinliklə üzləşdiz. Qələbə qazandığınıza görə özünüzü xoşbəxt sayırsız?
- Çətin oyun oldu. Bizim üçün hər matç önəmlidi. Bu gün çox güclü rəqiblə səfərdə qarşılaşdıq. “Qarabağ” iddialı komandadı. Bu gün çox əziyyət çəkdik. Amma yekunda lazım olan nəticəni qazana bildik.
- Smiti əvəzlədikdən sonra ona nə dediz?
- Hər oyunçu hiss etməlidi ki, ona şans verilir. Xüsusən də akademiyanın yetirmələri. Smit həftə ərzində yaxşı hazırlaşmışdı. Oyundan sonra ona dedim ki, daha cəsarətli oynasaydı, epizodların birində qol vəziyyəti yarada bilərdi.
- Bu gün onu hansı keyfiyyətlərinə görə ilk dəqiqələrdən meydana buraxdız?
- Həm hücumda, həm də hücuma keçid fazasında özünü yaxşı tərəfdən göstərə bilir. Sağ ayağından yaxşı istifadə edir. Ən çox da məşqdə tapşırıqlarıma diqqətlə qulaq asır. Hər matça belə yanaşsa, mənim üçün çox yaxşı olar.
- “Qarabağ” sizi nə ilə təəccübləndirdi?
- Fərqli oyunlarını təhlil etmişdik. Həm avrokubokda, həm də daxili çempionatda. “Sportinq” və “Şerif”lə matçlarını izləmişdik. “Sportinq”lə qarşılaşmanı ən yüksək formada keçirmişdilər. “Atletiko” ilə görüşlər də yadımızdadı. Biz də çalışdıq ki, onlar yüksək keyfiyyətlərindən yararlana bilməsinlər.
- Monrealın əvəzlənməsi zədə ilə bağlı idi və Obameyanqın durumu nə yerdədi?
- Monreal taktiki dəyişiklik idi. Obameyanqın durumu isə hələ bəlli deyil. Həftəsonu çempionat oyunumuz var. Bütün futbolçularımızı həmin görüşə hazır etməyə çalışacağıq. Qonaqların baş məşqçisinin ardından konfrans salonuna "Qarabağ"ın çalışdırıcısı Qurban Qurbanov daxil oldu. 46 yaşlı mütəxəssis əvvəlcə qarşılaşma ilə bağlı fikirlərini bölüşdü.
- Bəli, məğlub olduq. Dünəndən bu oyun barədə futbolçularla çox danışırdıq. İstəyimiz rəqibdən çəkinmədən yaxşı oyun göstərmək idi. Bunu bacardıq. Amma qol epizodlarında rəqib ustalıq cəhətdən bizi üstələdi. Azarkeşlər möhtəşəm idi. Böyümək üçün bəzən belə böyükhesablı məğlubiyyətlər lazım olur. Qalib gəlmək üçün də qol vəziyyəti yaratmağı bacarmalısan. Bu gün ustalıq çatmadı ki, qol imkanlarından maksimum yararlanaq. Hər birimiz üçün maraqlı oyun və böyük təcrübə oldu.
- İlk dəfə “Qarabağ”ı bu qədər pressinq edən gördük. Bu əvvəlcədən düşünülmüş addım idi, yoxsa oyunun gedişində buna qərar verdiz?
- Bəli, düşünülmüş addım idi. Emerinin komandasını nə zaman üçlü müdafiə ilə oynatdığı yadıma gəlmir. Fərqli formada hazırlaşmışdıq. Amma oyun ərəfəsində rəqibin start heyətinə diqqət yetirdikdə dəyişikliyin olduğunu gördük. Buna baxmayaraq, taktiki baxımdan dəyişiklik etməyə qərar verdik. Rəqibi öz cərimə meydanında qarşılamağı lazım bildik. Kimlər üçünsə gözlənilməz olsa da, futbolçular üçün tanış sistem idi. Oyunçular verdiyim tapşırıqları düzgün yerinə yetirdilər.
RƏŞAD