"Qəbələ" Misli premyer-liqasının 22-ci turunda "Karvan-Yevlax"la heç-heçə etdi - 1:1.

"Football-plus.az" xəbər verir ki, "qırmızı-qaralar"ın baş məşqçisi Kaxaber Sxadadze oyunsonrası mətbuat konfransında jurnalistlərin suallarını cavablandırıb.

- Bu gün iki xal itirdik. Çoxlu qol vəziyyətlərimiz oldu. Amma bunlardan istifadə edə bilmədik. Lazım olmayan anda sadə qollar buraxırıq. Sonra oyunu ələ aldıq. Qol epizodlarından istifadə etmək lazımdı. Futbolçularıma bununla bağlı heç nə deyə bilmərəm. Sadəcə belə bəsit qollar buraxmaq olmaz. Bəxt amilini də vurğulamaq lazımdı. Bu gün bəxt bizdən üz döndərmişdi.

- Bundan sonra penaltiləri Seydina Keyta vuracaq?
- Əvvəlki oyunda da əslində Keyta vurmalı idi. Həmin anda Adriel Ba Lua topu götürdü və penaltini vurmaq üçün xahiş etdi. Əsas penalti vuranımız Keytadı, ikinci isə Ba Lua.

- Yanvardan sonra Ba Luanın performansında eniş hiss olunur. Siz necə düşünürsüz?
- Ba Lua demək olar ki, qış təlim-məşq toplanışını bizimlə keçirmədi. Sənəd problemi var idi, pasportunu dəyişməli idi. Ölkəsində proses uzandı. Ona görə də hazırlıq prosesinə gec qoşuldu. O, öz üzərində işləyir. Son ötürmələrdə və zərbələrdə çatışmazlığı var. Özü də bunu görür, başa düşür. Bizim üçün vacib oyunçudu. Ümid edirik ki, yavaş-yavaş əvvəlki formasını bərpa edəcək.

- İsmael Akinadenin start heyətində yer almamasının səbəbi nə idi?
- Son oyunlarda zəif təsir bağışlamışdı. Sanki bir matçda oynayır, sonra onda eniş yaşanır. Həm də oruc tutur. Cüssəli futbolçudu, onun üçün belə anlarda çətin olur.