Azad Mustafayev: “Ayrıca admin ştatı ayırmaq qeyri-mümkündü”
Ötən sayımızda “Kəpəz”in saytında yaşanan problemə toxunmuşduq. Məsələdən xəbərsiz olanlar üçün bir daha xatırladaq ki, Gəncə təmsilçisinin rəsmi saytı işləsə də, nədənsə orda “sarı-göylər”in birinci divizionda keçirdiyi oyunlar barədə nə məlumat, nə oyunlardan fotosessiya, nə də turnir cədvəli yerləşdirilib. Bu isə “Kəpəz”in bəzi azarkeşləri tərəfindən narazıqlıla qarşılanır. Məsələ ilə bağlı redaksiyamıza müraciət edən “Xəmsə” fanklubunun rəhbəri Adil Məmmədov klubun saytının işləməməsi səbəbindən komandanın heyətini, oyunlardan fotoları və başqa məlumatları yaymağı öz üzərlərinə götürmək istədiklərini bildirib.
Gəncəli futbolsevərlərin haqlı iradlarına münasibət öyrənmək, problemin nədən qaynaqlandığını bilmək üçün “sarı-göylər”in mətbuat katibi Azad Mustafayevlə əlaqə saxladıq: “Bu gün premyer-liqada çıxış edən “Səbail”, “Sabah” kimi klubların rəsmi saytı olmasa da, “Kəpəz”in saytı var və ötən mövsüm komanda elitada çıxış edəndə normal şəkildə də fəaliyyət göstərirdi. “Kəpəz” birinci diviziona düşəndən sonra klubun büdcəsi azaldıldı. Maddi imkanımız aşağı olduğundan sayt üçün ayrıca admin ştatı ayırmaq qeyri-mümkündü. Azarkeşlərimizin iradlarını qəbul edirəm. Ancaq vəziyyəti də sizə izah etdim. Çətinliyə baxmayaraq, yaxın vaxtlarda bu çatışmazlığı aradan qaldıracağıq. Gəncənin ən güclü İT mütəxəssislərindən biri - eyni zamanda “Kəpəz”in qatı azarkeşidi - bizimlə əlaqə saxladı. Maddi durumumuzu nəzərə alıb, təmənnasız bu yöndə kömək edəcəyini bildirdi. Öz sahəsində tanınmış mütəxəssislərdən olan həmin şəxs qısa vaxtda bütün problemləri yoluna qoyacağına söz verib. Yəqin ki, yaxın vaxtlarda gəncəli futbolsevərlər saytımızda komanda ilə bağlı istədikləri bilgini əldə edə biləcəklər”.
RƏŞAD