Bakıdakı ingilislər isə “Qarabağ”a müraciət etməyib
“Arsenal”ın səfər planlarına böyük ölçüdə aydınlıq gəlib. Oktyabrın 4-də Olimpiya stadionunda “Qarabağ”ın qonağı olacaq “topçular” Bakıya matçdan bir gün öncə təşrif buyuracaq. Ayın 3-ü günorta saatlarında Heydər Əliyev Hava Limanına enəcək ingilislər bir neçə saat sonra BOS-un yolunu tutacaq. Unay Emeri jurnalistlər önünə 18.00-da çıxacaq. Bundan yarım saat sonra isə londonluların media mənsubları üçün ilk 15 dəqiqəsi açıq olan matçöncəsi son məşqi baş tutacaq. Maraq üçün qeyd edək ki, “Arsenal” şəhərimizin dəbdəbəli otellərindən sayılan “Hilton”da məskunlaşacaq.
Dünyanın aparıcı klublarından sayılan “Arsenal”ın Bakıda dəstəksiz qalmayacağı gün kimi aydındı. Azarkeşlərin marağını nəzərə alan klub rəhbərliyi “Qarabağ” rəsmilərinə 700 biletin ayrılması ilə bağlı müraciət edib. 10 manatlıq sektor üçün nəzərdə tutulan bu sayda biletdən 550-si artıq satılıb. Bu isə o deməkdi ki, BOS-da azı 550 nəfər qonaqları dəstəkləyəcək. Ölkəmizdə xeyli sayda ingilisin çalışdığını nəzərə alsaq, say artımının müşahidə olunacağı sirr deyil. Lakin dünənə qədər heç bir şirkət biletlə bağlı “Qarabağ”a müraciət etməmişdi. Ehtimal olunur ki, özləri satış məntəqələrinə müraciət edib, biletləri topdan alacaqlar.
Məlum oyunu işıqlandırmaq üçün müxtəlif ölkələrdən xeyli sayda jurnalistin gələcəyinə şübhə yoxdu. Lakin bununla bağlı hələ ki “Qarabağ”a müraciət edən olmayıb.
Maraq üçün qeyd edək ki, dünən günorta saatlarına olan məlumata görə, oktyabrın 4-dəki qarşılaşmanı canlı izləmək istəyənlərin sayı 35 minə çatıb. Yəni bu sayda bilet satılmışdı. Bu gedişlə tribunaların dolacağı şübhə doğurmur.