1/4 final, ilk oyun
Sabah - Qəbələ 0:0
Sabah (Bakı): 92. Stas Pokatilov, 5. Rəhman Daşdəmirov, 40. İqor Noqeyra, 3. Stiv Solvet, 2. Amin Seydiyev (k) (80. Akim Zedadka, 74), 6. Abdulla Xaybullayev, 7. Umarali Raxmonaliyev, 70. Cesse Sekidika (19. Aaron Maluda, 74), 21. Velko Simiç, 11. Kahim Parris (46. Aleksey İsayev, 66), 83. Stefan Ende.
Ehtiyat oyunçular: 55. Nicat Mehbalıyev, 72. Rüstəm Samiqullin, 17. Tellur Mütəllimov, 10. Anatoli Nuriyev, 27. Timoteuş Puxaç, 13. İvan Lepinitsa, 53. Andrey Santos.
Baş məşqçi: Valdas Dambrauskas.

Qəbələ: 93. Rza Cəfərov, 66. Nuğay Rəşidov (3. Eduardo Kunde, 74), 28. Murad Musayev (k), 33. Seydina Keyta (22. Fərid İsgəndərov, 90), 27. Eşqin Əhmədov, 6. Xayme Syerra, 10. Şahin Şahniyarov (7. Turan Manafov, 74) 16. İsaak Amoah 30. Prins Ovusu (50. Adriel Ba Loua, 64), 14. Domi Massumo (70. Paulo Quimbila, 90) 24. İsmael Akinade.
Ehtiyat oyunçular: 1. Səlahət Ağayev, 94. Həbib Hüşənov, 11. Asif Məmmədov, 13. Nicat Əliyev, 74. Süleyman Damadayev, 21. Ziya Şəkərxanov, 12. İbrahim Sanqare.
Baş məşqçi: Kaxaber Sxadadze.

Massumo 29-cu dəqiqədə penaltidən yararlana bilməyib (qapıçı).
Vərəqə: C.Sekidika, 45+2 (qeyri-idman hərəkəti) - sarı.
Hakimlər: FƏRİD HACIYEV, Asiman Əzizli, Rəhman İmami, Kamran Əliyev (hamısı Bakı).
VAR hakimi: Nicat İsmayıllı (Bakı).
VAR hakiminin köməkçisi: Zeynal Zeynalov (Bakı).
Hakim-inspektor: Babək Quliyev (Bakı).
AFFA nümayəndəsi: Elgiz Abbasov (Masallı).
4 fevral. Bakı. “Bank Respublika Arena”. 300 tamaşaçı (8900 yerlik).
Birincin hissəyə 2, ikinci hissəyə 4 dəqiqə əlavə olunub.

Çempionatda sonuncu dəfə noyabrda ikidən az qol vuran və qələbə qazanmayan “Sabah” qış fasiləsindən sonra tərəqqi yaşayan “Qəbələ”ni qəbul etdi. Havanın kəskin soyuq olması Masazırda tribunaların boş qalmasını şərtləndirdi. Azarkeşlər gəlsəydi belə, meydanda baxımlı futbol adına nəsə yox idi.

Buna baxmayaraq, “Qəbələ”nin daha çox təhlükəli vəziyyət yaratdığını, qələbəyə daha yaxın olduğunu deyə bilərik. 3-cü dəqiqədə Nuğayın ötürməsini qəbul edən Eşqin rəqib müdafiəçiləri bədəni ilə aldadıb “çərçivə”yə zərbə endirməyi bacardı. Lakin bu topu qaytarmaq Pokatilov üçün asan oldu. 4 dəqiqə sonra ev sahibləri bu hücuma cavab verdi. Paris cərimə meydançasından daha dəqiq və qüvvətli zərbə endirdi. Lakin debüt oyununu keçirən Rza ayıq-sayıqlığı itirmədi. 28-ci dəqiqədə Aminin kobud səhvindən sonra topu ələ keçirən Massumo Akinade ilə oynadı və İsmaeli dayandırmaq üçün cərimə meydançasında Noqeyra qaydanı pozmağa məcbur qaldı. Bu mövsüm penalti vurmaqda çətinlik çəkən Massumo yenə də bacarmadı. Əvvəlcə Pokatilov, sonra qapı tiri “Sabah”ı qoldan xilas etdi. Bundan sonra narahatlığa qərq olan “Sabah” da təhlükəli vəziyyətlə yadda qaldı. Bu dəfə “bayquşlar” tiri “nişan aldı”. Umaralinin zərbəsi təhlükəli olsa da, dəqiq alınmadı. 35-ci dəqiqədə Şahinin yaratdığı baxımlı hücumdan sonra da hesab açıla bilərdi. 21 yaşlı yarımmüdafiəçinin qapı qarşısına ötürməsindən sonra Akinade ləng davrandı və topa toxuna bilmədi. İlk hissədə qol səsi eşitmədik.

İkinci yarıda da üstün tərəf qonaqlar oldu. 57-ci dəqiqədə yenə də hissənin ilk zərbəsi Eşqindən gəldi. Lakin bu dəfə dəqiq alınmadı. 62-ci dəqiqədə Umarali uzaqdan baxımlı zərbə vurdu. Top havada istiqamətini dəyişsə də, Rza üçün bunu dəf etmək çətin olmadı. 3 dəqiqə sonra Amin – Abdulla - Simiç “üçlüy”ünün qurduğu hücumun da qarşısını Rza aldı. Matçın qalan dəqiqələri də bərabər səviyyədə davam etdi. Cansıxıcı oyunda qapılarda qol vurulmadı. Bu cütün qalibi martın əvvəlində Qəbələdə bəlli olacaq.

Gözdən qaçmadı
// “Qəbələ” Əsasnaməni pozdu, yəni stadiona oyunun başlamasına 90 yox, 55 dəqiqə qalmış gəldi.

MÜZƏFFƏR QULUZADƏ