1/4 final, ilk oyun
Turan Tovuz - Kəpəz 1:0 (0:0)
Turan Tovuz: 41. Sergey Samok, 32. Hayderson Urtado, 15. Emmanuel Hakman, 5. Roderik Miller, 7. Xorxe Silva, 23. Alexandro Serrano, 17. Rəhim Sadıxov (6. Fərid Yusifli, 79), 19. Roberto Olabe (10. Xəyal Nəcəfov, 61), 88. Faiq Hacıyev (k), 99. İbrahima Vaci (90. Joarlem Batista, 61), 11. Ayxan Hüseynov (9. Coş Cinnelli, 61).
Ehtiyat oyunçular: 1. Oleq Baklov, 4. Şəhriyar Əliyev, 14. Murad Dadaşev, 3. Enrike Silva, 8. David Tavareş.
Baş məşqçi: Kurban Berdıyev.

Kəpəz (Gəncə): 33. Yusif İmanov, 17. Ümid Səmədov, 29. Dioqo Verdaşka, 4. Mate Abuladze, 27. Məqsəd İsayev, 99. Əli Səmədov (k) (24. Olavale Onanuqa, 71), 11. Rəhman Hacıyev (5. Rauf Hüseynli, 79), 88. Şakir Seyidov, 77. Fərid Nəbiyev (14. Adama Fofana, 61), 21. Sadiq Şəfiyev (9. Luis Paçu, 46), 7. Ehtiram Şahverdiyev (10. Rinosuke Ohori, 46).
Ehtiyat oyunçular: 22. Məmməd Hüseynov, 81. Elgün Bayramov, 20. Elcan Əbilov, 23. Fərid Kələntərov, 66. Arzu Atakişiyev, 80. Şahnur İsmayılov, 83. Raul İsaqov.
Baş məşqçi: Azər Bağırov.

Qol: H.Urtado, 57.
Vərəqələr: X.Silva, 17 (qeyri-idman hərəkəti). İ.Vaci, 41 (qeyri-idman hərəkəti) - sarı.
Hakimlər: ƏLİ ƏLİYEV, Cəmil Quliyev, Gülnurə Əkbərzadə, Elvin Bayramov (hamısı Bakı).
VAR hakimi: Rəvan Həmzəzadə (Şəki).
VAR hakiminin köməkçisi: Teymur Teymurov (Bakı).
Hakim-inspektor: Rəhim Həsənov (Bakı).
AFFA nümayəndəsi: Zaur Hacıməhərrəmov (Bakı).
5 fevral. Bakı. “Azərsun Arena”. 300 tamaşaçı (4677 yerlik).
Birinci hissəyə 3, ikinci hissəyə 4 dəqiqə əlavə olunub.

"Turan Tovuz" premyer-liqada ötən mövsümü 4-cü yerdə başa vursa da, "Sabah"ın ölkə kubokunu qazanması planları pozdu. Çünki belədə mövsümü ilk "dördlük"dən kənarda bitirən "bayquşlar" Avropa Liqasına vəsiqə qazandı.

"Bozqurd" cari mövsümə daha iddialı başlayıb. Ehtiyatda "Qəbələ" ilə oyunu olmasına rəğmən, 3-cü pillədə qərarlaşan komanda avrokuboklara can atır. Ancaq bu o demək deyil ki, kuboka barmaqarası baxmaq, gücünü premyer-liqa üçün səfərbər etmək fikrinə düşəsən. Hər halda, elitadakı yerini qorumaq uğrunda mübarizə aparan "Kəpəz" də bu yarışda mümkün qədər çox irəliləmək fikrindədi. Odu ki, məcburiyyətdən ev oyunlarlnı Suraxanıda keçirən "Turan Tovuz"u çətin matçın gözlədiyi bəlli idi. Bu yöndə fikrimizi qətiləşdirmək üçün çox gözləməli olmadıq. 5-ci dəqiqədə Vacinin Abuladzenin kobud müdaxiləsi üzündən yerdə qalması cərimə zərbəsinin təyin edilməsinə səbəb oldu. Topun arxasına keçın Ayxan təxminən 25 metrdən birbaşa "çərçivə"ni nişan alsa da, Yusif özünü yaxşı tərəfdən göstərdi.

Düzdü, bundan sonra "Kəpəz"in hadisələrin axarına nəzarət etmək niyyətində olduğunu gördük. Ancaq "sarı-göylər"in həlledici məqamlarda qeyri-dəqiq ötürmələrə yol verməsi "bozqurd" üçün ciddi təhlükənin yaranmasına mane oldu. Bu yöndə tilsimin qırılması da gəncəliləri sevindirmədi. Çünki 17-ci dəqiqədə irəli atılan qonaqlar Rəhmanın ötürdüyü, Ehtiramın başla tora qovuşdurmaq istədiyi topun tirdən qayıtmasına şahidlik etdi. Ardından "Turan Tovuz" hesabı açmaq şansını boşa verdi. Silvanın sol cinaha daşıdığı hücumu Vaci qolla tamamlaya bilərdi ki, seneqallı qeyri-dəqiq oynadı. Düzdü, "bozqurd"un 36-cı dəqiqədə qeydə alınan əsk-hücumu qolla nəticələndi. Vacinin qapıya paralel ötürməsindən sonra Şakirin ayaqlarına dolaşan top Silvanın önünə düşdü. Belədə "kürə"ni boş qapıya göndərən portuqaliyalı komandasını sevindirdi. Ancaq bu xoşbəxtlik uzun çəkmədi. Çünki epizodu VAR-da incələyən Əli Əliyev Vacinin Silvaya ötürmə etməzdən əvvəl təkbətək mübarizə apardığı Əliyə qarşı kobud oynadığını təsbit etdi. Bir qədər sonra Vaci Verdaşkaya qarşı da kobud oyunla diqqəti çəkdi. Sadəcə, az öncə seneqallıya "sarı" göstərən Əli Əliyev bu dəfə onu bağışladı...

Ümumiyyətlə, hadisələrin axarı 1-ci hissənin qolsuz bitməsiylə nəticələndi. İkinci yarı "Turan Tovuz"un qol fürsətini boşa verməsiylə başladı: 48-ci dəqiqədə Hakmanın başla zərbəsini Verdaşka qapı xəttinin üzərində zərərsizləşdirdi. "Bozqurd"un növbəti cəhdi də faydasız oldu. Çünki təxminən 25 metrdən "çərçivə"ni nişan alan Ayxan qeyri-dəqiq idi. Hər halda, tovuzlular hesabı aça bildi. Bu, Silvanın aut atışıyla oyuna daxil etdiyi topun Hakmanın ötürməsi sayəsində Urtadoya çatması, sonuncunun baş zərbəsindən sonra "çərçivə"yə düşməsi sayəsində mümkün oldu.
Bundan sonra "Kəpəz"in daha fəal oynaması gözlənilirdi. Lakin "sarı-göylər" hesabı bərabərləşdirmək yönündə addım atmaqda çətinlik çəkdi. Həmçinin qalan vaxtda xeyli qayda pozuntusu qeydə alındı ki, qısa fasilələr yarandı. Bununla belə, "Turan Tovuz" 80-ci dəqiqədə fərqi artırmaq imkanını qaçırdı: cərimə meydançasında Serranın ötürməsini qəbul edən Faiq Yusifi "nişan aldı". Nəticədə qalan vaxtda qol görmədik. "Turan Tovuz" minimal qələbəylə cavab oyunu ərəfəsində üstün duruma düşdü. Ancaq "Kəpəz"in şansının hələ tükənmədiyini desək, yanılmarıq.

Gözdən qaçmadı
// Tovuzlu azarkeşlər "Turan Tovuz"un şərflərini taxaraq komandaya dəstək oldu. Urtado qolunu "Ultras Turan"la birgə qeyd etdi. Gəncəlilər də tribunada idi. "20-ci zona" azarkeş qrupu sevimlilərini sonadək dəstəklədi.
// Kurban Berdıyev 4-cü hakimi itələdiyinə görə 64-cü, köməkçisi Yunis Hüseynov isə hakimin qərarına etiraz etdiyindən 41-ci dəqiqədə qırmızı vərəqə aldı. Berdıyevin meydanı tərk edərkən 4-cü hakimə barmaq silkələdiyini, hədə-qorxu gəldiyini də deməliyik.
// 71-ci dəqiqədə top uğrunda mübarizə zamanı Urtadoyla Şakir arasında mübahisə yaşandı. Miller də araya girdi. Bundan sonra futbolçuların komanda yoldaşları və Əli Əliyev hadisəyə müdaxilə etdi.

KƏNAN BAHADIR