Ramin Quliyev: "Bizdə uşaq futbolunun vəziyyəti həddən artıq acınacaqlıdı"
U-17 dünən Ukrayna ilə növbəti yoldaşlıq oyununu keçirib. İlk sınaq matçında bu rəqibə 7 cavabsız qolla məğlub olan Ramin Quliyevin yetirmələri yenilginin əvəzini çıxa bilməyib. Bu dəfə yığma 0:3 hesablı məğlubiyyətlə üzləşib. Düzdü, yoldaşlıq oyunlarında nəticə o qədər də önəmli deyil. Ancaq 0:7 artıq acınacaqlı vəziyyətin göstəricisidi. İki oyunda qapısına 10 top görən, qol vura bilməyən millinin qarşıdakı seçmə mərhələdə işi olduqca çətin olacaq.
Darmadağınlarla bağlı Ramin Quliyevin fikirlərini öyrəndik: "İlk oyunda uşaqlar rəqibdən çəkindilər, qorxdular. Sanki "bu komandaya qarşı oynamaq olmaz" düşüncəsi hiss olunurdu. Hər xırda səhv qolla nəticələndi və yekunda böyük hesabla məğlub olduq. İkinci yoldaşlıq oyununda isə fərqli ssenari yaşandı. İlk yarıda qapıçımızın səhvindən qol buraxdıq. Fasiləyə qədər bundan başqa qol vəziyyəti yaratmadılar. Yaxşı müdafiə olunduq. İkinci yarıda rəqib 10 nəfər eyni səviyyəli oyunçu meydana buraxır. Bizdə isə sonradan mübarizəyə qoşulub oyunu gücləndirəcək futbolçuların yoxluğu çətinlik yaradır. Belə deyim, rəqib əvəzetmələrlə oyunu gücləndirir, bizdə sonradan meydana çıxanlar keyfiyyəti aşağı salır. Bu gün Ukrayna futbol məktəbinin səviyyəsi hamıya məlumdu. Rəqib yığmanın heyətindəki oyunçulardan 8-i "Şaxtyor", 9-u Kiyev "Dinamo"sundandı. Səviyyə göz qabağındadı. Seçmə mərhələ ərəfəsində güclü rəqib seçməyimiz boşuna deyildi. Uşaqlar belə komandayla qarşılaşmalıydı ki, səhvləri görək. Başa düşürəm, seçmə mərhələdən öncə ağır məğlubiyyətlər təsir edə bilər. Lakin bundan nəticə çıxarmaq lazımdı. Komandamız bu cür futbola, belə rəqiblərə qarşı oynamağa öyrəşməlidi, hazır olmalıdı. Seçmə mərhələdəki rəqiblərimizdən Çexiya və Norveç də aşağı-yuxarı Ukrayna ilə eyni gücdədi. Odu ki, bu oyunlar bizə boşluqları, səhvlərimizi göstərir. Çalışıb 1 aydan sonra reallaşacaq seçmə mərhələyə hazır olmalıyıq. Bu gün bizim uşaq futbolu o səviyyədə deyil ki, Ukrayna ilə başabaş oynayaq. Yaxud da çox az geri qalaq. Hazırda bu iki ölkənin uşaq futbolunda yerdən göyə qədər fərq var. Bunu hamı bilir. Baş məşqçi kimi məni də qarşıda nələrin gözlədiyini bilirəm. Sadəcə, bu gün bizdə uşaq futbolunun vəziyyəti həddən artıq acınacaqlıdı. Bunu qəbul etməliyik".
Seçmə mərhələyə bir ay qalıbsa, problemləri aradan qaldırmaq çətin olacaq. Quliyevi dinləyək: "Sözsüz, vaxtımız çox azdı. Qarşıda 1 ay var. Keçirdiyimiz yoldaşlıq oyunlarında belə nəticələr qeydə alındı. Yaxşı ki, bunu bir ay əvvəl gördük. Komandadakı çatışmazlıqları gördük. Doğrudu, vaxtın az olması çətinlik yaradacaq. Buna baxmayaraq, əlimizdə olan uşaqlarla maksimum hazırlaşacağıq".
FARİZ