“Bu qarşılaşma bizim üçün əla test olacaq”
Xəbər verdiyimiz kimi, futzal yığmamız sentyabrın 23-də Qazaxıstanla yoldaşlıq oyunu keçirəcək. Bakı İdman Sarayında keçiriləcək oyun saat 16.00-da başlayacaq. Millnin heyəti bu gün keçiriləcək 2-ci turun oyunlarından sonra açıqlanacaq. Yığmanın baş məşqçisi Joze Alesio da Silva hazırlıq və oyun ilə bağlı Futzal Federasiyasının rəsmi saytına müsahibə verib.
- Qazaxıstanla oyunun hazırlığına nə vaxt başlayacaqsız?
- Sentyabrın 19-da yüksək liqada 2-ci turun oyunları keçiriləcək. Baş məşqçisi olduğum “Araz” “Xəzər Cənub”la qarşılaşacaq. Bildiyiniz kimi, rəqib komanda əsasən İrandan dəvət olunan legionerlərdən qurulub. Hazırda diqqətimizi bu oyuna yönəltmişik. Oyunu yekunlaşdırdıqdan sonra milli toplanışa başlayacaq. Sentyabrın 20-də bir yerə toplaşacağıq və Qazaxıstanla oyuna hazırlaşacağıq. Heyəti də turdan dərhal sonra açıqlayacağıq.
- Narahat olduğunuz məqamlar var?
- Rəhbərliyim altında milli ilk dəfə yerli çempionatda çıxış edən futzalçılardan formalaşacaq. Müəyyən problemlər olacaq. Çünki əvvəllər bu oyunçular Braziliyadan dəvət etdiyimiz futzalçılarla birgə oynayırdılar. Buna görə də meydanda anlaşma, bir-birini “sığortalama” baxımından problem yox idi. Hazırkı heyətin əksər üzvləri bir komandada çıxış etsələr də, çatışmazlıqlar olacaq. Ancaq müsbət məqam da var. Yerlilər özlərini sübut etməyə çalışacaqlar və daha istəkli olacaqlar. İstənilən halda, bu qarşılaşma bizim üçün əla test olacaq.
- Yığmanın qarşıdakı bir il ərzində heç bir rəsmi oyunu olmayacaq. Bunu nəzərə alsaq, yoldaşlıq görüşü komandaya nə qazandıracaq?
- FİFA-nın oyun “pəncərə”ləri var. Biz birinci “pəncərə”dən istifadə etmədik və yoldaşlıq matçı keçirmədik. Ancaq rəsmi oyunlar oldu-olmadı, bu cür qarşılaşmalara ehtiyac var. Ona görə də rəhbərliyə budəfəki fürsətdən istifadə etməyin lazım olduğunu bildirdim. Reytinq baxımından da vacibdi. Qarşıda hələ rəsmi oyunlarımız olmasa da, dekabr və yanvar aylarında beynəlxalq turnirlərə dəvət almışıq. Üstəlik, oyun təcrübəsinə hər zaman ehtiyac var. Bu görüş bizə ən azı beynəlxalq oyun təcrübəsi qazandıracaq.
- Millinin “Araz”dan ayrılan bir neçə üzvü İspaniya, Braziliya və Rusiya klublarında çıxış edirlər. Gələcəkdə onların xidmətindən yararlanmağı düşünürsüz?
- Onların güclü çempionatda oynamaları yaxşı haldı. Milliyə dəvət edib-etməyəcəyimlə bağlı indidən söz verə bilmərəm.
- Qazaxıstanla oyunu həm də bir növ “Araz”ın Çempionlar Liqasına hazırlığına kömək kimi qiymətləndirmək olarmı?
- Hər şeydən əvvəl bu, millinin oyunudu. Həm təcrübə qazanmaq, həm də reytinq xallarını artırmaq baxımından vacib görüşdü. Ancaq sualdakı məqamı gizlədə bilmərəm. Yığmanın sütununu “Araz”ın oyunçuları təşkil edir. Bu görüşün komandamıza az da olsa, köməyi dəyəcək. Çünki çempionatımız yeni başlayıb. Cəmi bir tur keçirilib, sabah (bu gün) isə ikinci turun oyunları olacaq. Bizə həmin vaxta qədər çox oyun keçirmək lazımdı ki, Çempionlar Liqasına necə hazırlaşdığımızı görək. Qazaxıstanla oyun çox çətin, ağır keçəcək. Braziliyalılarsız gəlsələr də, kifayət qədər güclü komandadı.
MİRAĞA hazırladı