“İmişli”nin futbolçuları Şirvan şəhərində yerləşən “Mərhəmət Evi” Uşaq Sığınacaq Mərkəzini ziyarət edib.

"Football-plus.az" xəbər verir ki, Yeni il ərəfəsində baş tutan bu xeyriyyə səfərinin əsas məqsədi sığınacaqda yaşayan uşaqlara bayram sevinci bəxş etmək olub.

Ziyarət zamanı klub nümayəndələri uşaqlarla yaxından ünsiyyət qurub, onlara Yeni il münasibətilə hədiyyələr təqdim edib. Səmimi və isti atmosferdə keçən görüş uşaqların sevincinə səbəb olub, onların üzündə təbəssüm yaradıb.

“İmişli"nin nümayəndələri bu cür sosial təşəbbüslərin cəmiyyət üçün əhəmiyyətini vurğulayaraq, xüsusilə həssas kateqoriyadan olan uşaqlara diqqət və qayğının vacibliyini qeyd ediblər. Klubun bu addımı Yeni il ərəfəsində mərhəmət, paylaşma və humanist dəyərlərin təbliği baxımından xüsusi əhəmiyyət daşıyır.

“İmişli” gələcəkdə də sosial məsuliyyət layihələri çərçivəsində bu kimi xeyriyyə aksiyalarını davam etdirməyi planlaşdırır və cəmiyyətin müxtəlif təbəqələrinə dəstək olmağı əsas prioritetlərindən biri hesab edir.