Fərid Nəbiyev isə dubla imza atdı
Rusiya premyer-liqasında 7-ci turun oyunları keçirilib. “Krılya Sovetov” Tulada “Arsenal”a müqavimət göstərə bilməyib - 0:4. Ramil Şeydayev darmadağını ehtiyat oyunçular skamyasından izləyib. 7 xalla 12-ci pillədə qərarlaşan samaralılar növbəti turda evdə “Krasnodar”la münasibətləri aydınlaşdıracaq.
Almaniyanın ikinci bundesliqasında 5-ci tur geridə qalıb. “Ertsgebirge” Auedə “Sankt Pauli”yə qalib gəlib - 3:1. Dmitri Nazarovun adı “18-liy”ə salınmayıb. 4 xalla 14-cü yerə yüksələn “bənövşəyilər” növbəti turda “Duysburq”un qonağı olacaq.
Almaniyanın 3-cü liqasında “Proyssen” səfərdə “1921 Aalen” tərəfindən darmadağına məruz qalıb - 1:4. Rüfət Dadaşov 90 dəqiqə oynayıb və komandasının yeganə qoluna imza atıb. Həmyerlimiz 85-ci dəqiqədə başla rəqib qapısına yol tapıb. Bu, Dadaşovun cari mövsümdə ikinci qolu olub. 9 xalla 13-cü sırada yer alan “qartallar” 8-ci turda Münsterdə “Enerji” ilə qarşılaşacaq.
Sequndada 5-ci turun oyunları keçirilib. “Alkorkon” doğma meydanda “Deportivo”nu üstələyib - 1:0. Eddi İsrafilov qələbəni ehtiyat oyunçular skamyasından izləyib. Xalını 8-ə çatdırmaqla 9-cu yerə yüksələn “Alkorkon” növbəti turda səfərdə İsrafilovun sabiq komandası “Kadis”i sınağa çəkəcək.
Ukrayna çempionatının 8-ci turunda “Aleksandriya” evdə “Şaxtyor”a uduzub – 0:2. Malta ilə oyunda zədələnən Pavel Paşayevin adı “18-liy”ə salınmayıb. 16 xalla 2-ci pillədə qərarlaşan “Aleksandriya” növbəti turda “Mariupol” səfərinə yollanacaq.
Qazaxıstan çempionatında sürpriz nəticə qeydə alınıb. “Astana” evdə “Kaysar”ın müqavimətini qıra bilməyib – 0:0. Riçard Almeyda sonadək ehtiyatda qalıb. 58 xalla liderliyi davam etdirən “Astana” 27-ci turda “Akjayik”in qonağı olacaq.
Türkiyənin 1-ci liqasında 5-ci tur geridə qalıb. “Boluspor” doğma meydanda “Altay”la qolsuz “sülh”ə razılaşıb. Ufuk Budak 90 dəqiqə oynayıb. “Girəsunspor” azarkeşləri önündə “Afyonspor”la bacarmayıb – 0:1. Ozancan Kökcü ikinci 45 dəqiqədə forma geyib.
Latviyanın birinci liqasında 17-ci turun oyunları keçirilib. “Dauqavpils” BJSS-ə qalib gəlib - 4:2. Start heyətində yer alan Vüqar Əsgərov 60-cı dəqiqədə əvəzlənib. Həm komandasının, həm də bütövlükdə çempionatın bombardiri olan Əsgərov bu oyunda da fərqlənməyi bacarıb. O, 36-cı dəqiqədə rəqib qapısına yol tapıb. Nəticədə millimizin sabiq forvardı cari mövsümdə vurduğu qolların sayını 23-ə çatdırıb. 43 xalla 2-ci pillədə qərarlaşan “Dauqavpils” növbəti turda RTU-nun qonağı olacaq.
Çexiyanın gənclər liqasının 8-ci turunda “Slaviya” evdə “Dinamo Çeske” ilə bərabərə qalıb – 4:4. Start heyətində yer alan Fərid Nəbiyev 86-cı dəqiqədə əvəzlənib. U-21 yığmamızın üzvü 45 və 58-ci dəqiqələrdə vurduğu qollarla dubla imza atıb.
SƏRXAN