“Sektor 11”in rəhbəri AFFA-nı qınadı
“Azərbaycanda azarkeş rəqibin adına görə stadiona gedir” deyimi ötən cümə bir daha təsdiqini tapdı. Oktyabrın 4-də keçiriləcək “Qarabağ” – “Arsenal” oyunu üçün indidən bilet axtarışına çıxan azarkeşlər millinin Kosovo ilə qarşılaşmasına biganə qaldılar. Halbuki futbola baxışından, hansı kluba azarkeşlik etməyindən asılı olmayaraq, yığma hər bir futbolsevərin qürur mənbəyi olmalıdı. Ona dəstək vermək, pis günündə də, yaxşı günündə də yanında olmaq şərəf məsələsidi. Kimsə ortaya çıxıb “yığma “Qarabağ” kimi bizi sevindirmir, Avropa səhnəsində uğurlu nəticə qazanmır” söyləməsin. Belə şablon sözlərlə həmin şəxslər özlərinə haqq qazandıra bilməzlər. Məgər övlad xəstə olanda və ya tərbiyəsizlik edəndə, valideyn ondan əl çəkir, imtina edir? Bu günə kimi uzağı bir-iki belə hala təsdüf etmiş olarıq. Həmin valideynləri də el qınayır. El qınağından ağır isə həyatda heç nə yoxdu. Milli də nə Elxan Məmmədovun, nə Qurban Qurbanovun, nə də Ramin Musayevindi. Yığma beynəlxalq arenada oyuna çıxanda Azərbaycan himni səslənir, üçrəngli bayrağımız yüksəlir.
Cümə günü Bakı Olimpiya Stadionunun tribunalarına baxanda adamın ürəyi ağrıyırdı. Oyuna gələn 19500 azarkeş 68700 tamaşaçı tutumuna malik arenada keçəl başda olan bir-iki tük kimi görünürdü. Səhnəyə çıxan aktyor zalı dolu görüb, bütün məharətini göstərmək istədiyi kimi, futbolçuya da dolu tribunalar qarşısında oynamaq zövq verir. Təsadüfi deyil ki, bütün dünyada azarkeşi “12-ci oyunçu” sayırlar. Təəssüf ki, “feysbuk”da və başqa sosial şəbəkələrdə özünü qəhrəman kimi təqdim edən, Kanada çempionatından tutmuş, Sinqapur birinciliyinə kimi dünyanın bütün çempionatlarını müzakirə edən, Rusiyanın uğuruna sevinib, Türkiyənin hər qələbəsini əlinə bayraq götürüb küçəyə çıxaraq dəli kimi qeyd edənlər Millətlər Liqasının ilk turunda, qrupdakı əsas rəqibimizlə matçda “12-ci oyunçu” olmağı bacarmadılar. Və ya bunu istəmədilər.
Matç ərəfəsində bilet satışı ilə maraqlanıb, fanklubların yığmaya dəstək olub-olmayacağını öyrənməyə çalışmışdıq. Əksər fanklublar yığmanın yanında olacağını bildirmiş, müxtəlif plakat və şüarlar hazırladıqlarını söyləmişdilər. Düzdü, oyun vaxtı tribunada onların varlığı hiss olundu. Ancaq tək əldən səs çıxmağıdı kimi, bir neçə yüz üzvü olan fanklubların da dəstəyi istənilən effekti vermədi. ”Sektor 11” fanklubunun rəhbəri Atanur Cəfərli də bizimlə söhbətdə elə bu məqama toxundu: “Açığı, mən gözləyirdim ki, millinin ilk oyununda stadionda minimum 30-35 min azarkeş olacaq. Ancaq çox təəssüf ki, onların sayı heç 20 minə çatmadı. Bəziləri deyir ki, Bakı Olimpiya Stadionu bir qədər uzaqdı, ora gedib-gəlmək narahatlıq doğurur. Ancaq milli hər gün oynamır ki. Məncə, yığma naminə ildə bir neçə dəfə bu əziyyətə qatlaşmağa dəyər. Kosovo ilə görüşdə “Qarabağ Ordu” fanklubu ilə bir yerdə idik. Sayımız təxminən 300 nəfər idi. Matçboyu milliyə dəstək verdik. Ancaq BOS-un akustikası elədi ki, bu çox da hiss olunmur. Bir də meydan tribunadan aralı yerləşdiyinə görə azarkeş dəstəyi “Tofiq Bəhramov”, “Bakcell Arena”dakı kim effektli alınmır. Fikrimcə, azarkeş sayının az olmasının səbəblərindən biri, bəlkə də birincisi AFFA-nın təbliğat işini vaxtında və düzgün aparmaması oldu. Hələ də bir çoxları Millətlər Liqasının mahiyyətini başa düşməyiblər. Dəfələrlə məndən bu turnirin yığmamıza nə verəcəyini soruşublar. Kosovo ilə oyun ərəfəsində azarkeşlərin diqqətini cəlb etmək üçün müxtəlif tədbirlər, “flaş-mob”lar keçirmək olardı. Hərdən mənə elə gəlir ki, Berti Foqtsun, Robert Prosineçkinin dönəmində AFFA-da çalışanlar yığmanın oyunlarının təbliğatını daha yaxşı aparırdılar. İndi sanki işlərinə bir qədər soyuq yanaşırlar”.
RƏŞAD